Tags-Chaand

vo laḌkī bhī jo chāñd-nagar kī raanī thī
vo jis kī alhaḌ āñkhoñ meñ hairānī thī

jo chāñd se haiñ badan haiñ vo chāñd tāroñ meñ
guloñ meñ haikaleñ haikal ke tā-kamar ta.avīz

chāñd ke ujle chehre par
vaqt kā gahrā saaya thā

vo bhī haiñ sāġhar-e-sharāb bhī hai
chāñd ke paas āftāb bhī hai

jo mere ḳhuuñ meñ bhaḌak rahī hai vo mish.al-e-ḳhvāb hai kahāñ kī
jo merī āñkhoñ meñ bas gayā hai vo chāñd hai kaun sī jabīñ kā

kaun likhegā Dhalte sūraj kā qissa
jo likhtā hai chāñd kī bāteñ likhtā hai

siyāh chāñd sitāre siyāh sūraj thā
sunā hai us ko ajab ik samāñ dikhā.ī diyā

ashk-e-ġham meñ nūr-e-rahmat is tarah shāmil rahā
chāñd-tāroñ se sivā ye chāñd-tāre ho ga.e

tum aa ga.e ho to kuchh chāñdnī sī bāteñ hoñ
zamīñ pe chāñd kahāñ roz roz utartā hai

duur ke chāñd ko DhūñDo na kisī āñchal meñ
ye ujālā nahīñ āñgan meñ samāne vaalā

aate jaate din kyā kahte haiñ sun
ilm ke chāñd charāġh se sāthī

tere pahlū meñ rakh ki dil apnā
chāñd-rātoñ meñ gungunā.ūñ tujhe

raat qātil kī galī ho jaise
chāñd iisā sā banī ho jaise

barseñ vafā ke chāñd kī kirneñ kuchh is tarah
be-nūr āñganoñ ko bhī tanvīr mil ga.ī

misr kā chāñd bhī shaidā hai azal se un kā
husn kā husn bhī dīvāna nazar aatā hai

hazāroñ chāñd sitāre nikal ke Duub ga.e
nagar meñ dil ke sadā jhuTpuTā sā rahtā hai

pañdrah din kā ho kar marne lagtā hai
kyuuñ ham chāñd ko paalā posā karte haiñ

ThiThurte paanī meñ sāñsoñ kā nam milāte hue
nadī meñ chāñd ke ham-rah nahātī bārish hai

maiñ ne phir chāñd tāroñ par Daalī kamandeñ
āsmānoñ ke vo jagmagāte makīñ

iḳhtilāf is baat par bhī qaum meñ paayā gayā
chāñd ḳhud niklā thā yā jabran nikalvāyā gayā