Tags-Chaand

naaz se vo zulf suljhāte rahe
chhat pe merī chāñd chamkā der tak

aao zindagī zindagī kheleñ
ye jhuuT hai ki maiñ tumhāre liye chāñd toḌ ke lā saktā huuñ

sar-e-nigāh bhī 'rāshid' dhanak dhanak paikar
pas-e-sahāb bhī ik chāñd chāñd saayā hai

abhī se aa ga.ī hai raat milne
abhī to chāñd bhī niklā nahīñ hai

raah meñ ghar ke ishāre bhī nahīñ nikleñge
chāñd Duubā to sitāre bhī nahīñ nikleñge

chamak uTThī jo mere zaḳhm-e-dil meñ kyā qayāmat hai
falak par chāñd niklā hogā yā koī hinsā hogā

chhiḌī thiiñ husn kī bahseñ idhar chāñd aur idhar tum the
kisī ko dekh kar be-parda koī chhup gayā hogā

chāñd aur sūraj donoñ āshiq dhartī kis kā maan rakhe
ik chāñdī ke gahne pheñke ik sonā bikhrā.e

dekhe shab-e-firāq meñ koī to ham dikhā.eñ
dil kā vo daaġh chāñd kā TukḌā kaheñ jise

ik yaad mire zehn meñ bujhtī huī aa.ī
ik chāñd mire khet se TuuTā huā niklā

shaam apne tilismāt meñ jakḌī huī aa.ī
chāñd apne ḳhayālāt meñ Duubā huā niklā

ḳhud-kushī kar lī chamakte chāñd ne bhī
āḳhir-e-shab aa.inā hone se pahle

shaam tanhā.ī dhuāñ uThtā barābar dekhte
phir sar-e-shab chāñd ubharne kā bhī manzar dekhte

chāñd tāroñ kī ziyā.eñ kahkashāoñ ke hujūm
kaun sā vo āsmāñ hai jo zamīnoñ meñ nahīñ

vīrāñ thī raat chāñd kā patthar siyāh thā
yā parda-e-nigāh sarāsar siyāh thā

ye bhī koī baat hai āḳhir duur hī duur raheñ matvāle
harjā.ī hai chāñd kā joban yā panchhī ko pyaar nahīñ hai

chāñd niklā jab moharram kā kahīñ
chup se dasht-e-karbalā rone lagā

dasht se ḳhaak uThā laayā thā ajdād kī maiñ
ghar meñ rakkhe to hue chāñd ke haale shab-o-roz

mātamī kapḌe pahan liye the merī zamīñ ne
aur falak ne chāñd sitāra pahan liyā thā

lahrā ke jhuum jhuum ke lā muskurā ke lā
phūloñ ke ras meñ chāñd kī kirneñ milā ke lā