Tags-Chehra

ga.e zamāne kī sūrat badan churā.e vo
na.ī rutoñ kī tarah se bhī muskurā.e vo

ye haath kitne hasīñ kitne ḳhūbsūrat haiñ
ye haath jin pe hai ik jaal sā lakīroñ kā

sūrat-e-zāhirī ik parda-e-tārīk thī 'yās'
husn-e-ma.anī kā kan-āñkhiyoñ se nazāra hotā

tujh se qismat meñ mirī sūrat-e-qufl-e-abjad
thā likhā baat ke bante hī judā ho jaanā

ye saaf zāhir hai zindagī meñ sukūñ kī hogī na koī sūrat
kahīñ ḳhizāñ kī ijāra-dārī kahīñ fareb-e-bahār hogā

behtar nahīñ hai sūrat-e-jānāñ kā tasavvur
dil aur kisī shai se bahal jaa.e to achchhā

ab bāz-gasht kī koī sūrat nikal sake
yuuñ to tire baġhair bhī ye dil jiyā kiyā

vahshat-e-ātish-e-dil se shab-e-tanhā.ī meñ
sūrat-e-dūd rahā saaya gurezāñ mujh se

asar-e-ābla se jāda-e-sahrā-e-junūñ
sūrat-e-rishta-e-gauhar hai charāġhāñ mujh se

sayyād ne lagtā hai ki fitrat hī badal dī
har phuul mujhe ḳhaar kī sūrat meñ milā hai

tā.ir-e-dil ko havā-e-ḳham-e-zulf-e-sayyād
sūrat-e-murġh-e-giraftār liye phirtī hai

tumhāre lafzoñ kī dhīmī ḳhushbū havās-e-ḳhamsa ko nochtī hai
ḳhatoñ kī sūrat meñ sach kahūñ to azaab rakkhe hue haiñ ghar meñ

na pūchh ab mujh se tū merī umīdoñ kī ye sūrat hai
ki haiñ bhī aur nahīñ bhī jis tarah pur-lutf kam tere

apne nasīb meñ to na ho āb-e-ḳhizr-e-lab
sairāb hoñ ba-sūrat-e-ilyās aur log

ham to na ghar meñ aap ke dam-bhar Thaharne paa.eñ
roz aa.eñ jaa.eñ sūrat-e-anfās aur log

vo sham-e-shab-anjām kī sūrat to nahīñ thā
ik pal meñ shab-e-nisf utar aa.ī hai ghar meñ

ghar samjhā huuñ jis ko kahīñ turbat to nahīñ hai
aatī hai yahāñ shaam kī sūrat meñ sahar bhī

le ke aa.ī to sabā us gul-e-chīnī kā payām
vo sahī zaḳhm kī sūrat lab-e-ḳhandāñ to khulā

ab darmiyāñ koī bhī shikāyat nahīñ bachī
ya.anī qarīb aane kī sūrat nahīñ bachī