Tags-Chehra

bādbānoñ ne har ik samt badal kar dekhī
koī manzar na nazar sūrat sāhil aayā

vo tap-e-ishq-e-tamannā hai ki phir sūrat-e-sham.a
sho.ala tā-nabz-e-jigar resha-davānī māñge

kitāb-e-dil kā mirī ek baab ho tum bhī
tumheñ bhī paḌhtā huuñ maiñ ik nisāb kī sūrat

terī ma.asūmī ke sadqe merī mahrūmī kī ḳhair
ai ki tujh ko sūrat-e-ārām-e-jāñ samjhā thā maiñ

ham vo vafā-parast tujhe dekhne ke ba.ad
apnī taraf bhī sūrat-e-dīvār dekhnā

kiyā hai maiñ ne iz.hār-e-tamannā jaane kis kis se
mujhe aksar tirī sūrat kā dhokā ho hī jaatā hai

jis meñ sūrat-numā ho naqsh-e-murād
aisā naqsha nazar nahīñ aatā

terī furqat meñ vaqt kī sūrat
rafta rafta guzar rahe haiñ ham

reg-e-ummīd ke shādāb sarāboñ ke tufail
maiñ ne dekhā hai kabhī sūrat-e-sahrā ḳhud ko

tumhāre ishq-e-abrū meñ hilāl-e-īd kī sūrat
hazāroñ uñgliyāñ uTThīñ jidhar se ho ke ham nikle

rūThtā hī nahīñ kisī sūrat
dil tirī bebasī samajhtā hai

zinda rahne meñ huuñ shāmil aur na mar jaane meñ huuñ
sūrat-e-tasvīr meñ bhī ā.ina-ḳhāne meñ huuñ

taskīn-e-dil-o-jāñ kī to nikle koī sūrat
is neza-e-mizgāñ kī anī dil chubho leñ

kyā vo achchhā hai agar sirf hai sūrat achchhī
sūrat achchhī jo ḳhudā de to ho sīrat achchhī

jahāñ kī nairañgiyoñ se yaksar badal ga.ī āshiyāñ kī sūrat
qafas samajhtī haiñ jin ko nazreñ vo dar-haqīqat qafas nahīñ hai

āġhāz-e-siyah-mastī anjām-e-siyah-mastī
ā.īne meñ sūrat bhī aane kī qasam khātī

varna kab tak liye phirtā rahūñ us ko 'javvād'
koī sūrat ho ki ummīd se rishta TuuTe

pareshāñ zulf muñh utrā huā mahjūb sī āñkheñ
vo bazm-e-ġhair se āshiq kī sūrat ban ke aate haiñ

ye bhī aa jaatī hai jab dekh lī sūrat terī
sach hai ulfat nahīñ muñh dekhe kī ulfat terī

kyā ġharaz us se ho dushman pe ināyat terī
ham to jiite haiñ faqat dekh ke sūrat terī