Tags-Chehra

pahle kuchh aur hī tevar the ye tevar tere
pahle kuchh aur hī sūrat thī ye sūrat terī

chāhne vāloñ kā hañgāma kisī din hogā
ek din tujh ko rulā.egā ye sūrat terī

ye bhī aa jaatī hai jab dekh lī sūrat terī
sach hai ulfat nahīñ muñh dekhe kī ulfat terī

kyā ġharaz us se ho dushman pe ināyat terī
ham to jiite haiñ faqat dekh ke sūrat terī

dil jo tū chāhe to jā bazm meñ us kī ham to
dekh us sūrat-e-majlis ko Dare aate haiñ

falsafe kī ḳhūbsūrat tarjumānī tū ne kī
dasht-e-hū meñ āñsuoñ se bāġhbānī tū ne kī

ham naġhma-sarā kuchh ġhazloñ kī ham sūrat-gar kuchh ḳhvāboñ ke
be-jazba-e-shauq sunā.eñ kyā koī ḳhvāb na ho to batā.eñ kyā

rañg se rāsta sūrat se patā letā huuñ
aur bichhḌe hue ik ishq ko jā letā huuñ

be-sūrat be-jism āvāzeñ andar bhej rahī haiñ havā.eñ
band haiñ kamre ke darvāze lekin khiḌkī khulī huī hai

sañvarte zāviyoñ meñ muskurātī shakl hai merī
chaTaḳhte ā.inoñ meñ bhī koī merī hī sūrat hai

ashkoñ kī sūrat āñkhoñ ke sāhil par
roz nayā ik lashkar aan utartā hai

merī sūrat se agar nafrat nahīñ
kyuuñ badal jaatī hai rañgat aap kī

hūreñ jannat se to pariyāñ qaaf se
dekhne aatī haiñ sūrat aap kī

dil girafta ho ke chup baiThe haiñ shāyad is tarah
rahm aa.e dekh kar sūrat hamārī haa.e haa.e

duur tak bikhrā huā ret kī sūrat hai vajūd
ḳhud ko āvāz idhar de ki udhar de koī

patthar kī sūrat be-his ho jaatā huuñ
kaisī kaisī choTeñ sahtā rahtā huuñ

chhoḌ har ek ko burā kahnā
aisī sūrat pe tujh ko kyā kahnā

ab dhaḌaktā hai magar sūrat-e-dil
zaḳhm ik tum ne diyā thā mujh ko

ho bazm-e-tarab yā bazm-e-alam har majme.a meñ har mauqe.a par
ham sham.a ke sho.ale kī sūrat jalte bhī haiñ sar bhī dhunte haiñ