Tags-Chehra

himmat ko nazar pā nahīñ saktī kisī sūrat
dil koī baḌā hai jo koī aañkh baḌī hai

jo hañsā to sūrat-e-zaḳhm-e-dil ki lahū ke qatre Tapak paḌe
maiñ sitam-rasīda huuñ 'ārzū' na bahā.ūñ ashk to kyā karūñ

jis se pūchheñ tire baare meñ yahī kahtā hai
ḳhūbsūrat hai vafādār nahīñ ho saktā

vo shaḳhs sūrat-e-ḳhurshīd jab nikaltā hai
to rañg-o-nūr meñ ham bhī nahā.e jaate haiñ

phir se badal ke miTTī kī sūrat karo mujhe
izzat ke saath duniyā se ruḳhsat karo mujhe

merī āñkhoñ se Dhalakte hue har ashk meñ aaj
aks-e-anjām bhī hai sūrat-e-āġhāz bhī hai

ḳhuun thūkā mudām sūrat-e-zaḳhm
dil-e-nāsūr ab tak aalā hai

sūrat-e-dil baḌe shahroñ meñ rah-e-yak-tarfa
jaane vāloñ ko bahut yaad kiyā kartī hai

banā husn-e-takallum husn-e-zan āhista āhista
bahar-sūrat khulā ik kam-suḳhan āhista āhista

maiñ ne jab tab jidhar jidhar dekhā
apnī sūrat kā hī bashar dekhā

un ke jaane se ye dil meñ huī sūrat paidā
ki huā dard aur us meñ huī shiddat paidā

kyā ajab sūrat raqīb-e-rū-siyah kī dekh kar
ḳhauf se hālat huī ho paanī paanī aap kī

ek aalam kohkan kī tarah sar phoḌegā ab
gar isī sūrat rahī shīrīñ-zabānī aap kī

koī qāsid nahīñ koī sūrat nahīñ
ḳhat ko likkhe hue bhī bahut din hue

maiñ huuñ vo nā-tavāñ pinhāñ rahā ḳhud aañkh se apnī
hamesha aap ko gum sūrat-e-tār-e-nazar paayā

merī sūrat banī to ḳhaak banī
qismat ai sūrat-āfrīñ bantī

bas ab to ek hī sūrat hai jaañ bachāne kī
bas ab to ek hī rasta dikhā.ī detā hai

maiñ huā ḳhā.if to us ke bhī uḌe hosh-o-havās
merī jo sūrat huī vo hū-ba-hū us kī bhī thī

sīrat meñ hai jo husn vo sūrat meñ nahīñ hai
pākīzgī-o-sharm-o-hayā aur hī kuchh hai

latāfat ishq kī hai māna-e-nazzāra-e-sūrat
mohabbat ḳhud hijāb-e-darmiyāñ mālūm hotī hai