Tags-Chehra

ham shā.eroñ kā halqa halqa hai ārifoñ kā
nā-āshnā-e-ma.anī sūrat nahīñ hai koī

sūrat se is kī behtar sūrat nahīñ hai koī
dīdār-e-yār sī bhī daulat nahīñ hai koī

qudrat-e-zabt bhī logoñ ko dikhā.ī ham ne
sūrat-e-ashk bhī āñkhoñ se chhalak dekhā hai

vo sūrat dekh lī ham ne to phir kuchh bhī na dekhā
abhī varna paḌī thī ek duniyā dekhne ko

duniyā se duniyā meñ rah kar kaise kināra kar rakkhā hai
dekh to aa kar kis sūrat se ham ne guzāra kar rakkhā hai

vo raushnī hai ki az-fard-tā-ba-fard tamām
kisī kī shakl na sūrat kisī kā rañg na ruup

jo tū mahr hai to zarra ham haiñ tū bahr hai to qatra ham haiñ
tū sūrat hai ham ā.īna hameñ tujh se ġharaz tujhe ham se ġharaz

tirī sūrat ko jab dekhā hai maiñ ne
urūj-e-fikr-o-fan yaad aa gayā hai

aaj bhī yādoñ ke vīrāne meñ dost
terī sūrat hai zarā ubhrī huī

āvāra aaj sūrat-e-barg-e-ḳhizāñ mile
miltī thī jin se bād-e-sabā bā-adab kabhī

sūrat-e-zāhid na jaago hazrat-e-dil so raho
qibla-e-man kāba-e-maqsūd dikhlātī hai niiñd

maiñ tamām gard-o-ġhubār huuñ mujhe merī sūrat-e-hāl de
mirī ḳhaak hai ki uḌī huī ise jism ke ḳhad-o-ḳhāl de

sochiye phuul khilā hai kyā kyā
sūrat-e-sañg na dekhā kiije

pahle to ik makān kī sūrat hī thā faqat
tashrīf aap laa.e to ghar merā ghar huā

dil jo sūrat-gar-e-ma.anī kā sanam-ḳhāna bane
aañkh jis shai pa paḌe jalva-e-jānāna bane

ham na kahte the ki naqsh us kā nahīñ naqqāsh sahl
chāñd saarā lag gayā tab nīm-ruḳh sūrat huī

aks us be-dīd kā to muttasil paḌtā thā sub.h
din chaḌhe kyā jānūñ ā.īne kī kyā sūrat huī

sūrat-e-lafz-o-ibārāt-o-ma.ānī andar
jalva-gar tuuñ che huā hai mere dīvān meñ aa

phaTī purānī sī chunarī meñ
kyā bholī sūrat hotī hai

aañkh majbūr-e-tamāshā hai 'farāz'
ek sūrat hai ki har sū chamke