Tags-Chehra

jo ahl-e-shahr ko kisī sūrat nahīñ hai raas
aisī yahāñ pe āb-o-havā bhī huā huuñ maiñ

pareshāñ ho ke dil tark-e-ta.alluq par hai āmāda
mohabbat meñ ye sūrat bhī na raas aa.ī to kyā hogā

vo hī mūrat vo hī sūrat vo hī qudrat kī tarah
us ko jis ne jaisā sochā vo bhī vaisā ho gayā

chāñdnī apne saath laa.ī hai
terī sūrat meñ raat aa.ī hai

us kī sūrat us kī āñkheñ us kā chehrā bhuul ga.e
jis raste par barsoñ bhaTke ham vo rastā bhuul ga.e

dil ke andar tuur ke uupar chashm-e-sanam meñ ain haram meñ
terī hī sūrat terī hī mūrat pūjne jaa.eñ tujh ko kidhar ham

ham apne vaqt kī tasvīr-e-masḳh-sūrat haiñ
dikhā.e ham ko na ā.īna rozgār bahut

ham ik varaq pe to haiñ do hurūf kī sūrat
magar nasīb kā likkhā huā na ham haiñ na tum

duniyā kā dastūr yahī hai dil yuuñ kab tak ro.egā
in achchhī sūrat vāloñ ne kis se piit nibhā.ī hai

nigāh milte hī rañg-e-hayā kī sūrat haiñ
chhalak uThīñ tire ruḳh se latāfateñ dil kī

ajab sūrat hai vo jab bhī kahīñ jaa.e to aa jaa.e
kahīñ rasta kināre mujh se Takrā.e to aa jaa.e

koī sūrat bhī shanāsā nazar aa.ī na hameñ
ghar se nikle to ajab shahr kā naqsha dekhā

zaḳhm-e-jigar kā vā kisī sūrat vahāñ na ho
paikān-e-yār is meñ jo shakl-e-zabāñ na ho

maiñ us ko us ke bāhar dekhtā huuñ saḳht mushkil meñ
koī bhī aks us kā asl sūrat se nahīñ miltā

aa.ina ban ke vo sūrat sāmne jab aa ga.ī
aks apnā dekh kar mujh ko hañsī aa.ī bahut

shaam ke sāyoñ kī sūrat phailte jaate haiñ ham
lag rahī tañg ham ko ghar kī añgnā.ī bahut

ab yuuñ bhī nahīñ hai ki vo achchhā nahīñ lagtā
yuuñ hai ki mulāqāt kī sūrat nahīñ hotī

kar detā hai be-sāḳhta bāñhoñ ko kushāda
jab bach ke nikal jaane kī sūrat nahīñ hotī

itne baḌe shahr meñ koī hamārā na thā
apne sivā āshnā ek bhī sūrat na thī

aur koī chārā na thā aur koī sūrat na thī
us ke rahe ho ke ham jis se mohabbat na thī