Tags-Chehra

sitam-zarīfī kī sūrat nikal hī aatī hai
raqīb kī bhī zarūrat nikal hī aatī hai

dil meñ muzmar hai ma.anī-e-bāqī
kisī sūrat nahīñ zavāl hameñ

shāḳh-e-tanhā.ī se phir niklī bahār-e-fasl-e-zāt
apnī sūrat par hue ham phir bahāl us ke liye

haa.e muñh Dhāñk ke rone kī bhī sūrat na rahī
dasht meñ chhīn liyā ḳhaar ne dāmāñ apnā

malak-ul-maut kī sūrat se maiñ ghabrātā huuñ
aap rakhte mujhe sharminda-e-ehsāñ apnā

ai 'shamīm' behtar hai duur hī raho sab se
sañg-e-mīl kī sūrat fāsle miTā kar bhī

hai ajab sūrat yahāñ takrār kī
dil kī māneñ baat yā dildār kī

hai ye sūrat ġham ke bas iz.hār kī
Dhaal diije shakl meñ ash.ār kī

hai ḳhushī itne meñ hī bīmār kī
koī sūrat to huī dīdār kī

sūrat bhī pesh-e-chashm hai sīrat bhī pesh-e-chashm
dam bhar meñ to pasand hai dam bhar meñ nā-pasand

jo bhes apnā badal ke aayā to rañg-e-itlāq muñh se dhoyā
kiyā hai paanī meñ qaid mujh ko havā kī sūrat habāb meñ huuñ

bikhar rahī hai mohabbat kī raushnī har sū
uḌā rahā hai koī sūrat-e-ġhubār mujhe

jab bhī aatā hai koī rañg zamāne jaisā
kuchh na kuchh sūrat-e-inkār nikal aatī hai

aaj kuchh sūrat-e-aflāk judā lagtī hai
dekhtā huuñ tirī jānib to ghaTā lagtī hai

koī dīvār salāmat hai na ab chhat merī
ḳhāna-e-ḳhasta kī sūrat huī hālat merī

dekhte ho merī taraf kyā miyāñ
apnī bhī sūrat pe nazar kījiye

kāġhaz pe shab o roz tirī khīñchūñ huuñ tasvīr
ya.anī isī sūrat basar-auqāt kahīñ ho

kuchh to ubhar ai sūrat-e-shīrīñ ki dikhā.ūñ
farhād ke zimme bhī ajab koh-kanī hai

jis chehre ko dekhā vo ā.īna-e-dūrī thā
dīvār kī sūrat thā jis dar pe qadam pahuñche