Tags-Civilization

na.ī tahzīb takalluf ke sivā kuchh bhī nahīñ
chehra raushan ho to kyā hājat-e-gulgūna farosh

ise tahzīb-e-ġham kā naam ahl-e-dard dete haiñ
mire aañsū kabhī dāman tumhārā nam nahīñ karte

tahzīb-e-nau kī raushnī meñ jal-bujhe tamām
maazī kī yādgār mire ilm aur funūn

aaj ke daur kī tahzīb kā patthar le kar
ek dīvāne kā sar phoḌ diyā bachchoñ ne

sharīf log chaḌhe jab nahīñ haiñ koThoñ par
to kis ke saath ye tahzīb baam par aa.ī

virāsat huuñ maiñ ik Dhaltī huī tahzīb kī 'sārim'
kahīñ khoyā gayā huuñ maiñ kahīñ paayā gayā huuñ maiñ

isī manzar ke pīchhe aur bhī dhuñdle se manzar haiñ
purānī gum-shuda tahzīb ke ghar haiñ

ishq meñ tahzīb ke haiñ aur hī kuchh falsafe
tujh se ho kar ham ḳhafā ḳhud se ḳhafā rahne lage

vo shaḳhs apnī jagah hai muraqqa-e-tahzīb
ye aur baat hai ki qātil usī kā naam bhī hai

chehre paḌhnā to sabhī siikh ga.e haiñ lekin
kaisī tahzīb hai apnoñ ko parāyā kahiye

ek tahzīb ke sahīfe kā
shāyad ab hissa-e-aḳhīr huuñ maiñ

kaun kahtā mujhe shā.ista-e-tahzīb-e-junūñ
maiñ tirī zulf-e-pareshāñ ko agar chheḌ na duuñ

ye tahzīb-e-chaman badlī hai bairūnī havāoñ ne
garebāñ-chāk phūloñ par kalī kā muskurā denā

na.ī tahzīb ne barbād ġhārat kar diyā bilkul
ham apne mulk se ab is ko ġhārat kar ke chhoḌeñge

tumhārī tahzīb apne ḳhanjar se aap hī ḳhud-kushī karegī
jo shāḳh-e-nāzuk pe āshiyāna banegā nā-pā.edār hogā

guphāoñ jañgaloñ se duur
ham tahzīb kī dhun par

āvārgī kā naam hai tahzīb-e-nau yahāñ
āñkhoñ meñ sharm hai na badan par libās hai

apnā hī to hai shahkār-e-amal tahzīb kā ye zindāñ 'akbar'
ham aaj haiñ shahroñ ke qaidī kal tak āvāra-e-sahrā the

urdu ġhazal ke dam se vo tahzīb bach ga.ī
miTne kā jis ke gul thā fanā ke baġhair bhī

ham se tahzīb kā dāman nahīñ chhoḌā jaatā
dasht-e-vahshat meñ bhī ādāb liye phirte haiñ