Tags-Civilization

kyuuñ sādgī se us kī takrār ho ga.ī hai
tahzīb se tabī.at bezār ho ga.ī hai

use sikhāo ki tahzīb-e-guftugū kyā hai
zarā sī baat pe talvār khīñchtā hai koī

paidā mire naġhmoñ se huiiñ nuur kī lahreñ
maiñ ḳhāliq-e-tahzīb añdheroñ kī ziyā huuñ

raat apne ḳhvāb kī qīmat kā andāza huā
ye sitāra niiñd kī tahzīb se paidā huā

hamāre ḳhuuñ se ibārat hai shajra-e-tahzīb
yahāñ pe mohr-e-siyādat abhī na rakkhī jaa.e

unheñ na toliye tahzīb ke tarāzū meñ
gharoñ meñ un ke na chūlhe na diip jalte haiñ

mujh ko tahzīb ke barzaḳh kā banāyā vāris
jurm ye bhī mire ajdād ke sar jā.egā

na.ī nasloñ ko kis ne kyā diyā hai dekhiye lekin
mire ash.ār meñ tahzīb kā me.aar bolegā

ghuT gayā tahzīb ke gumbad meñ har ḳhvāhish kā dam
jañgaloñ kā mor ham ne ghar ke andar rakh liyā

chalo ham maan lete haiñ
hamāre darmiyāñ tahzīb thī ik zaḳhm-e-ḳhvāhish kī

koī tahzīb bhī sā.ista-e-malbūs nahīñ
jis ko bhī dekhā sar-e-rāh barahna dekhā

ravāñ hai mauj-e-junūñ pe ehsās kā safīna
aur ek tahzīb is safīne pe chal rahī hai

saarī duniyā Dhal rahī hai maġhribī tahzīb meñ
be-hayā.ī ab mirī poshāk ho jā.egī kyā

har taraf uryāñ-tanī ke jashn hoñge roz o shab
is qadar tahzīb-e-nau bebāk ho jā.egī kyā

dehāt ke basne vaale to iḳhlās ke paikar hote haiñ
ai kaash na.ī tahzīb kī rau shahroñ se na aatī gaañv meñ

tahzīb jahāñ tharrātī hai tārīḳh-e-bashar sharmātī hai
maut apne kaTe par ḳhud jaise dil hī dil meñ pachhtātī hai

ham apne aap ke qātil bane haiñ
ye kis tahzīb kī jādūgarī hai

bashar jo aaj hai tahzīb-o-irtiqā kā amiiñ
faqat darinda thā irfān-e-zāt se pahle

kuchh to rahe aslāf kī tahzīb kī ḳhushbū
Topī hī lagā lījiye dastār nahīñ to

bahār naam hai tahzīb-e-mausam-e-dil kā
avaam mausam-e-gul ko bahār kahte haiñ