Tags-Civilization

jab insān ne paḌhnā sīkhā
paḌhne lagā tahzīb kī aayat

apnī tahzīb khā rahī hai hameñ
saañp ke muñh meñ ḳhud sapere haiñ

ruḳh pe kartā hai matānat paidā
dil meñ aate hī ḳhayāl-e-tahzīb

murda qaumoñ ke liye āb-e-hayāt
bantā jaatā hai zulāl-e-tahzīb

kabhī hotā nahīñ bad-vaz.a kā ḳhauf
hai ajab jāh-o-jalāl-e-tahzīb

us kā ḳhuuñ karte haiñ jo nāhaq-kosh
un kī gardan pe vabāl-e-tahzīb

āj-kal ham meñ agar sach pūchho
shakl anqā hai misāl-e-tahzīb

jām-e-jam se hai kahīñ pur-tamkīñ
bazm-e-ḳhullat meñ sifāl-e-tahzīb

kam nahīñ mardumak-e-chashm se kuchh
ruḳh-e-insān pe ḳhāl-e-tahzīb

qaum kā apne na ghaTtā vo uruuj
ho na jaatā jo zavāl-e-tahzīb

hai vo ārā.ish-e-husn-e-bātin
jis ko kahte haiñ jamāl-e-tahzīb

apne matlab kā jahāñ kuchh ho lagāv
nahīñ rahtā hai ḳhayāl-e-tahzīb

badr ban jā.egā chande meñ 'habīb'
haq ne chāhā to hilāl-e-tahzīb

mehr-o-ulfat se ma.āl-e-tahzīb
ḳhāksārī hai kamāl-e-tahzīb

na.ī tahzīb meñ diqqat ziyāda to nahīñ hotī
mazāhib rahte haiñ qaa.im faqat īmān jaatā hai

badan pe ḳharqa-e-tahzīb phaTne vaalā hai
jise bachā ke rakhā hai bahut sambhālā hai

is daur-e-intishār kā ye bhī hai hādisa
tahzīb zinda rah ga.ī insān mar gayā

nikalte haiñ kar ke ġhol-bandī ba-nām-e-tahzīb o dard-mandī
ye kah ke lete haiñ sab se chande hameñ jo tum do tumheñ ḳhudā de

galiyoñ meñ jo phirte haiñ ye mānūs se chehre
Dhaltī huī tahzīb ke ghar DhūñD rahe haiñ

ek tahzīb hai mujhe maqsūd
mujh ko ik daur se mohabbat hai