Tags-Crime

kis liye zinda huuñ maiñ kis ke liye zinda huuñ
jurm aisā hai ki tāvīl nahīñ ho saktī

ab shahr meñ aqdār-kushī ek hunar hai
fan jurm hai me.ār-kushī ek hunar hai

kyā haqīqat kī numā.ish merī ḳhātir jurm thī
tū ne jo ā.īna dekhā us ke TukḌe kar diye

kaun sā jurm ḳhudā jaane huā hai sābit
mashvare kartā hai munsif jo gunahgār ke saath

kuchh is ḳhatā kī sazā bhī to kam nahīñ miltī
ġharīb-e-shahr ko ik jurm-e-āgahī hai bahut

himmat-e-ālī kā itnā to ziyāñ honā hī thā
jurm-e-gīhāñ-tāb ko be-ḳhānumāñ honā hī thā

jurm-e-ulfat se jhuk ga.iiñ āñkheñ
chaar un se mirī nazar na huī

kabhī fāsloñ kī masāfatoñ pe ubuur ho to ye kah sakūñ
mirā jurm hasrat-e-qurb hai to yahī kamī yahāñ sab meñ hai

zinda huuñ bas ek yahī hai merā jurm
log khaḌe haiñ le kar patthar chāroñ or

maslak-e-ishq hai pairvī-e-vafā
hikmat-o-maslihat sochnā jurm hai

zindagī-bhar kī nīndeñ uchaT jā.eñgī
sāya-e-zulf meñ baiThnā jurm hai

aise māhaul meñ aa ga.e ham jahāñ
apne māhaul kā jā.eza jurm hai

zauq-e-dīdār par laakh pābandiyāñ
dekh kar phir unheñ dekhnā jurm hai

ḳhāmushī bhī salīqa hai fariyād kā
un ke jaur-o-sitam par gilā jurm hai

un kī shān-e-karam kah rahī hai 'rishī'
un se ab koī bhī iltijā jurm hai

har taraf haiñ mohabbat kī majbūriyāñ
ibtidā jurm hai intihā jurm hai

un ke jalvoñ kā jab sāmnā ho gayā
phir kisī aur kā sāmnā jurm hai

dāvā-e-ishq hai jurm-e-avval agar
inhirāf-e-vafā dūsrā jurm hai

aarzū jurm hai mudda.ā jurm hai
us fazā meñ ummīd-e-vafā jurm hai

aañkh uThā kar unheñ dekhiye kis tarah
sar uThāne kā bhī hausla jurm hai