Tags-Crime

ġhalat hai jazb-e-dil kā shikva dekho jurm kis kā hai
na khīñcho gar tum apne ko kashākash darmiyāñ kyuuñ ho

sazā har jurm kī manzūr hai mujh ko magar ye kyā
ki har laġhzish pe fitrat ham-zabāñ ma.alūm hotī hai

'rashk'-sāhab maiñ asīr-e-jurm-e-nā-ma.alūm huuñ
kaise mumkin hai mujhe nākāmiyoñ kī ḳhū na ho

vo to jaañ le ke bhī vaisā hī subuk-nām rahā
ishq ke baab meñ sab jurm hamāre nikle

maiñ ne mujrim ko bhī mujrim na kahā duniyā meñ
bas yahī jurm kiyā hai koī afsos nahīñ

yahīñ tayyār haiñ jo kuchh kaho jo hukm farmāo
hamāre jurm par pābandī-e-roz-e-jazā kyuuñ ho

ye bāteñ aaj kī kal jis kitāb meñ likhnā
tum apne jurm ko mere hisāb meñ likhnā

sahar kaisī sahar kā zikr bhī ik jurm Thahrā hai
añdherī raat kā dekhā hai ye andher bhī maiñ ne

subūt-e-jurm na milne kā phir bahāna kiyā
ki adliya ne vahī faisla purānā kiyā

bīnā.ī mire shahr meñ ik jurm hai lekin
har aañkh ko rañgoñ ne giraftār kiyā hai

jaan maqtal par luTā dī be-sabab 'ḳhuddar' ne
jurm us ke lan-tarānī se bayāñ hote rahe

adl se muñh moḌ kar jab munsifī hone lage
saḳht kāfir jurm bhī ab maz.habī hone lage

har-qadam par mirī kāñToñ ne pazīrā.ī kī
jurm pūchho to bahāroñ kī tamannā karnā

har ik jurm-e-mohabbat us nigāh-e-lutf ke sadqe
naved-e-āfiyat le kar ḳhatā karne kā vaqt aayā

maqtūl ko bāñhoñ meñ liye baiThā rahūñ kyuuñ
is jurm se lenā hai use aur maza kiyā

goyā zinda rahnā bhī ik jurm tere shahr meñ thā
ham har ik aahaT pe larze ham har ik dhaḌkan pe dahle

ahl-e-dānish ne kabhī ḳhvāb meñ sochā bhī na thā
jurm ban jā.egā is daur meñ insāñ honā

jurm meñ ham kamī kareñ bhī to kyuuñ
tum sazā bhī to kam nahīñ karte

maiñ fard-e-jurm terī tayyār kar rahā huuñ
ai āsmān sun le hushyār kar rahā huuñ

sitam kī rasmeñ bahut thiiñ lekin na thī tirī anjuman se pahle
sazā ḳhatā-e-nazar se pahle itaab jurm-e-suḳhan se pahle