Tags-Crime

ishq agar jurm hai to jurm-e-sanam
be-sabab be-shumār kar luuñ maiñ

mohabbat jurm aisā hai ki mujrim hai khaḌā be-sudh
kiyā kyā hai gunah kyā hai sazā kyā hai ḳhatā kyā hai

ḳhud-kushī jaisā koī jurm nahīñ duniyā meñ
koī batlātā nahīñ jā ke ye parvāne ko

jurm-e-nazzāra kī paatā hai sazā dil ab tak
ahl-e-dil dekh liyā ahl-e-nazar dekh liyā

jurm-e-ulfat pe hameñ log sazā dete haiñ
kaise nādān haiñ sho.aloñ ko havā dete haiñ

tumheñ mohabbat karne ke jurm meñ sazā-e-maut dī jaatī hai
us ne cigarette kā tavīl kash lete hue

bas ek jurm-e-mohabbat pe us sitamgar ne
diye haiñ shām-o-sahar saikḌoñ azaab mujhe

har jurm-o-ḳhatā se mire vāqif hai vo phir bhī
tajvīz mare naam sazā bhī nahīñ kartā

'musavvir' us se kaho umr bhar na mil paa.e
baḌā hai jurm aziyyat bhī intihā.ī de

vo koī aur hai 'alvī' jo sher kahtā hai
tum is ke jurm kī dete ho kyuuñ sazā mujh ko

tum jurm-e-vafā par jo ho āmāda-e-tāzīr
ye sirf mire dil kā taqāzā to nahīñ thā

ik taraf qānūn hai aur ik taraf insān hai
ḳhatm hotā hī nahīñ jurm-o-sazā kā silsila

mujhe dil kī ḳhatā par 'yās' sharmānā nahīñ aatā
parāyā jurm apne naam likhvānā nahīñ aatā

'asġhar' harīm-e-ishq meñ hastī hī jurm hai
rakhnā kabhī na paañv yahāñ sar liye hue

chāhne aur chāhe jaane kī ḳhvāhish jurm nahīñ lekin
rusvā.ī ko apne sar kī chādar karnā paḌtā hai

kaun sā jurm ḳhudā jaane huā hai sābit
mashvare kartā hai munsif jo gunahgār ke saath

dī us ne mujh ko jurm-e-mohabbat kī vo sazā
kuchh be-qusūr log sazā māñgne lage

bas har ik raat yahī jurm kiyā hai maiñ ne
lā ke ḳhvāboñ meñ tujhe dekh liyā hai maiñ ne

kis ko sazā-e-maut milegī ye kaisī hai bhiiḌ lagī
aur kyā us ne jurm kiyā thā koī nahīñ batlātā hai

tirā dasht bhī to hai be-karāñ mirī vahshatoñ kī bhī had nahīñ
mire jurm-e-ḳhāna-ḳharāb ko to ye rahguzar bhī dilāsā hai