Tags-Crime

aap kā jurm nahīñ ham hī ḳhatā kar baiThe
dil ne bas chāhā tumheñ ġham ne Thikāne dekhe

vo jurm ham se jo sarzad nahīñ hue 'az.har'
abhī to un kā hameñ e'tirāf karnā hai

kyuuñ har ghaḌī zabāñ pe ho jurm-o-sazā kā zikr
kyuuñ har amal kī fikr meñ ḳhauf-e-ḳhudā kī shart

vafā hai jurm to iqrār-e-jurm hai mujh ko
ye maiñ huuñ ye mirā dil lījiye sazā diije

shahr se nikle haiñ ham kis jurm kī pādāsh meñ
ye to us ko dekhnā thā vo sitamgar dekhtā

jurm-e-mohabbat mujh tak hī rahtā
un kā bhī dāman uljhā huā hai

ḳhudā-e-do-jahāñ is jurm ko muaaf kare
uḌaa.ī hai lab-e-gul-rañg kī hañsī maiñ ne

zindagī jurm to aa.ed kar de
be-gunāhī ko sazā bhī dūñgā

hazāroñ saal chalne ki sazā hai
batā ai vaqt terā jurm kyā hai

jurm-e-ummīd kī sazā hī de
mere haq meñ bhī kuchh sunā hī de

ek ik mauj mujh se Takrā.ī
jurm ye thā ki maiñ shanāvar thā

maiñ jurm-e-ḳhamoshī kī safā.ī nahīñ detā
zālim use kahiye jo duhā.ī nahīñ detā

shahr meñ jurm-o-havādis is qadar haiñ āj-kal
ab to ghar meñ baiTh kar bhī log ghabrāne lage

mohtasib se maiñ akelā hī nimaT saktā huuñ
jis ne jo jurm kiyā hai vo mire naam kare

huuñ isī jurm kī pādāsh meñ pyāsā shāyad
tapte sahrāoñ ko dariyā nahīñ likhkhā maiñ ne

na tū ne mai chakhī zāhid na jurm-e-ishq kiyā
to sub.h o shaam tujhe fikr kis azaab kā hai

itnā kar detā ki tū koī mujhe ilzām de
dī sazā par jurm koī to mire sar bhī na thā

pyaar kā donoñ pe āḳhir jurm sābit ho gayā
ye farishte aaj jannat se nikāle jā.eñge

to ye jaan lete ki sach hai kyā ye jo fard-e-jurm hai sab ġhalat
vo jo paḌh ke matn hī rah ga.e kabhī hāshiya bhī to dekhte

jurm-e-bosa pe jo 'bedār' ko maarā maarā
na karo jaane do is baat pe takrār bahut