Tags-Cruelty

zulm sahte rahe shukr karte rahe aa.ī lab tak na ye dāstāñ aaj tak
mujh ko hairat rahī anjuman meñ tirī kyuuñ haiñ ḳhāmosh ahl-e-zabāñ aaj tak

use bhī thoḌā sā ehsās-e-zulm ho jaa.e
palaT ke tiir koī gar kamān tak pahuñche

raushnī kī ye havas kyā kyā jalā.egī na pūchh
ārzū-e-subh kitne zulm Dhā.egī na pūchh

ġhusse meñ biivī ye bolī shauhar se
tum ne to bas zulm mujhī par Dhaa.e haiñ

roz kī daad kaun devegā
zulm karnā tumhārī aadat hai

shikār zulm kā jo haiñ unhīñ pe hai har shiddat
vo jo haiñ zālim un par koī itaab nahīñ hai

zulm sah kar bhī hai ḳhilqat ḳhāmosh
mohr hoñToñ pe lagī ho jaise

gul-chīnoñ ke zulm kī koī had hī nahīñ
kis din har ik shāḳh se ḳhanjar niklegā

maiñ us lahū meñ se huuñ jis kā ek ik qatra
fasīl-e-zulm pe dīvāna-vār TūTtā hai

hai zulm magar fariyād na kar
ai ishq hameñ barbād na kar

ye zulm tū ai jallād na kar
ai ishq hameñ barbād na kar

yuuñ zulm na kar be-dād na kar
ai ishq hameñ barbād na kar

zulm nāhaq na karo koī din
jiyo aur jīvne do banda-navāz

furāt jiit ke bhī tishna-lab rahī ġhairat
hazār tīr-e-sitam zulm kī kamīñ se chale

rah gayā yaad tumheñ jaur-o-jafā zulm-o-sitam
lutf-o-altāf-o-ināyāt-o-karam bhuul ga.e

yahāñ zulm kī haiñ kamandeñ darāz
kahāñ tak kareñ āshiyāna buland

zulm ko bardāsht karnā jurm hai
zālimāna fe.al kā dam toḌ de

himmat-e-mardāñ agar qaa.em hai to phir fikr kyā
zulm ke sar ko kuchal de haq ke matvāle na dekh

ā.īna ḳhud-numā.ī un ko sikhā rahā hai
kyā qahr kar rahā hai kyā zulm Dhā rahā hai

hairat hai ki jo zulm se taqdīr banā.eñ
kuchh log unheñ sāhab-e-tauqīr banā.eñ