Tags-Cruelty

har jafā un kī huī ham ko vafā se baḌh kar
ab nikāleñ vo koī zulm jafā se baḌh kar

dushmanoñ se kar lo samjhauta 'kiran'
dostoñ kā zulm sahnā chhoḌ do

ham se pūchho to zulm behtar hai
in hasīnoñ kī mehrbānī se

tum is qadar jo niDar ho ke zulm karte ho
butāñ hamārā tumhārā koī ḳhudā bhī hai

takalluf bartaraf nazzārgī meñ bhī sahī lekin
vo dekhā jaa.e kab ye zulm dekhā jaa.e hai mujh se

hue qaid jurm-e-vafā pe bhī ki hisār-e-zulm nasīb thā
mirī fard-e-jurm ajiib hai jo mire lahū se likhī ga.ī

merā ġhalat gila sahī zulm-o-jafā ravā sahī
nāz-e-sitam bajā sahī aañkh koī churā.e kyuuñ

ham ne māñgī bhī duā-e-abr-e-rahmat kis ghaḌī
jab saroñ par zulm ke bādal nazar aane lage

log to kahte the 'āzim' ye kabhī phaltī nahīñ
zulm kī Tahnī pe kaise phal nazar aane lage

tumhāre zulm tumhāre sitam nahīñ likhte
ham apne aap kī qismat ḳharāb likhte haiñ

kisī be-dard ko zulm-o-sitam kā shauq jab hogā
ye merā ek dil lākhoñ diloñ meñ muntaḳhab hogā

zulm chup-chāp sahe jāoge āḳhir kab tak
ai asīrān-e-qafas muñh meñ zabāñ hai ki nahīñ

phir us ke baad jo tū chāhe zulm kar duniyā
bas ek harf-e-duā mustajāb mere liye

zulm kī qadr ke liye hai rahm
daad kuchh bahr-e-dād-ḳhvāh nahīñ

vo jo rāh-e-zulm pe āñdhiyoñ meñ charāġh le ke nikal paḌe
vo zavāl-e-asr ke sar-buland kahāñ haiñ asr-e-zavāl meñ

kyā lutf ki vo zulm bhī jaarī nahīñ rakhte
kyā dost haiñ kuchh laaj hamārī nahīñ rakhte

zulm se zikr-e-vafā aur sivā hotā hai
un kī har ek burā.ī meñ bhalā hotā hai

jise dast-e-zulm chhupā sake na havā-e-jaur bujhā sake
sar-e-rāh-e-manzil-e-zindagī vo charāġh ham ne jalā diyā

falak jo chāhe ham par zulm kar le
abhī to zabt-e-āh-e-ātishīñ hai

vo jis kī amn kī buniyād par ta.amīr kī thī
'amīr' us shahr-e-jāñ meñ zulm toḌe jā rahe haiñ