Tags-Cruelty

tum bhī zulm kahāñ tak karte maiñ bhī unheñ kahāñ tak sahtī
tum bhī itne bure nahīñ ho maiñ bhī aisī bhalī nahīñ huuñ

ye zulm hai ki zulm ko kahtā huuñ saaf zulm
kyā zulm kar rahā huuñ mujhe maar dījiye

ek ma.asūm se chehre pe ra.ūnat kī numūd
haa.e kyā zulm kiyā ālam-e-barnā.ī ne

zulm phir zulm hai baḌhtā hai to miT jaatā hai
ḳhuun phir ḳhuun hai Tapkegā to jam jā.egā

zulm sah kar jo uf nahīñ karte
un ke dil bhī ajiib hote haiñ

be-sabab zulm kī āñdhī na chalāo mujh par
yuuñ ujaḌ jā.egā gulzār-e-tamannā dekho

mazlūmī mirī aur zulm dekh us but-e-kāfir kā
rahm aayā sitam ke ta.iiñ be-dād bahut royā

itnī jaldī na kar muravvat meñ
zulm mujh pe mazīd karnā hai

hālāt ne chehroñ pe bahut zulm kiye haiñ
ā.īna agar dekhā to Dar jāoge logo

zulm to zālimoñ kā sheva hai
qahr hai tum jo tajziya na karo

shukr-e-ḳhudā ki zulm se ma.azūr hai falak
bartāniya hai ḳhalq kī ġham-ḳhvār āj-kal

havā bhī garm hai chhā.e haiñ surḳh bādal kyuuñ
ye zulm kis pe huā roī ḳhāk-e-maqtal kyuuñ

zulm sahne vāloñ kā sabr ḳhatm hotā hai
sirf ek dhamkī hai phailtī hai dahshat kyā

tumhāre zulm kī mī.ād ghaT bhī saktī hai
ye mere paañv kī zanjīr kaT bhī saktī hai

zulm donoñ ne kiyā thā donoñ the is meñ sharīk
ibtidā gar tū ne kī to intihā maiñ ne bhī kī

yaas
morid-e-zulm huuñ āmāj-gah-e-tīr huuñ maiñ

vaqtī ye hisāb-e-zulm kab hai
tārīḳh ke hāfize meñ sab hai

zulm kab tak kījiyegā is dil-e-nāshād par
ab to is bande pe Tuk kiije karam banda-navāz