Tags-Cruelty

ham us ke zulm ke baḌhne ke intizār meñ the
tabhī to zabt kī quvvat baḌhā rahe the ham

kuchh zulm o sitam sahne kī aadat bhī hai ham ko
kuchh ye hai ki darbār meñ sunvā.ī bhī kam hai

koī javāb to sūraj ke zulm kā bhī ho
maiñ bārishoñ kī jo ThanDī phuvār ho jā.ūñ

amn 'kaifī' ho nahīñ saktā kabhī
jab talak zulm-o-sitam maujūd hai

maiñ mulk-badar sabr bhī kar saktī thī lekin
ye dekhnā thā zulm kī sarhad hai kahāñ tak

ġhairat-e-ishq koī raah nikāl
zulm vo sab pe ravā rakhte haiñ

tulte haiñ jis tarāzū meñ sīm-o-zar o guhar
kyā zulm hai diloñ ko bhī tauleñ usī se ham

taḳht kī ḳhvāhish luuT kī lālach kamzoroñ par zulm kā shauq
lekin un kā farmānā hai maiñ in ko jazbāt likhūñ

umr bhar bahte haiñ ġham ke tund-rau dhāroñ ke saath
jaane kyuuñ hote haiñ itne zulm fankāroñ ke saath

zulm kī shiddat ḳhud apnī hī maut kā baa.is bantī hai
jiit kī sūrat dekh rahe haiñ ham apnī paspā.ī meñ

ye barq-e-hādisāt bhī kyā zulm Dhā.egī
uThne lage guloñ se sharar dekh lījiye

shab ga.e bīmār logoñ ko jagānā zulm hai
aap hī mazlūm baniye raat bāhar kāTiye

terā milnā aur bichhaḌnā kyā kaheñ kis se kaheñ
ek jān-e-nā-tavāñ par zulm kyā kyā ho ga.e

ham teġh-o-sipar chhīn liyā karte haiñ 'anjum'
zālim se kabhī zulm kā shikva nahīñ karte

zulm to be-zabān hai lekin
zaḳhm ko tū zabān kab degā

dekhnā chheḌūñgā maqtal meñ bhī sāz-e-sarmadī
ishq par jab zulm hogā naġhma-ḳhvāñ ho jā.ūñgā

jab zulm kā badla zulm huā mazlūm kā haq kuchh bhī na rahā
de dard hī meñ lazzat yārab naale ko atā tāsīr na kar

zulm-o-sitam kī taḳht-nashīnī ke din jo aa.e
ghar ghar udaas shahr kī ra.anā.ī chhin ga.ī

ab zulm meñ izāfa na kar bāni-e-jafā
qasr-e-sitam ke aage koī sā.ebāñ na chhoḌ

un ke zulm-o-sitam kā kyā shikva
husn kī shoḳhī-e-adā kahiye