Tags-Cruelty

is ahd-e-zulm meñ maiñ bhī sharīk huuñ jaise
mirā sukūt mujhe saḳht mujrimāna lagā

haq na mil paa.e mashaqqat kā to hotā hai yahī
zulm ke sāmne hote haiñ sahāre patthar

jo zulm kiyā tū ne kiyā be-jigrī se
aisā to kisī kā bhī jigar ho nahīñ saktā

zulm had se guzartā rahā
ashk fariyād kartā rahā

zulm sahte rahe shukr karte rahe aa.ī lab tak na ye dāstāñ aaj tak
mujh ko hairat rahī anjuman meñ tirī kyuuñ haiñ ḳhāmosh ahl-e-zabāñ aaj tak

sitam-gāroñ ko mil jā.egā apne zulm kā badla
kabhī āh-e-ġharībāñ ko na be-tāsīr dekheñge

husn-e-ḳhud-bīñ jis kī fitrat sheḳhī shoḳhī zulm-o-jaur
dām-e-ulfat meñ phañs jaa.e merī āñkhoñ dekhī baat

zulm kā shauq bhī hai sharm bhī hai ḳhauf bhī hai
ḳhvāb meñ chhup ke vo aate haiñ satāne ham ko

hasīñ ho zehra-jamāl ho tum mujhe satā kar nihāl ho tum
tumhāre ye zulm 'qurrat-ul-ain' ko batāne maiñ jā rahā huuñ

tāqat nahīñ hai jī meñ nai ab jigar rahā hai
phir dil sitam-rasīda ik zulm kar rahā hai

ahd-e-insāf aa rahā hai 'munīr'
zulm daa.em huā nahīñ kartā

tujh se kyā kyā tavaqqo.eñ thiiñ hameñ
so tire zulm ne nirās kiyā

qalam ko is liye talvār karnā
ki baḌh ke zulm par hai vaar karnā

tirā zulm-o-sitam tujh ko nahīñ mālūm ai zālim
tirī bedād kā ik shor saqf-e-āsmāñ tak hai

jafā aur zulm kī fariyād le kar ham kahāñ jaa.eñ
rasā.ī ġhair mumkin tere sañg-e-āstāñ tak hai

log to chup haiñ zulm sah kar bhī
mujh se kyoñ chup rahā nahīñ jaatā

jāgīr na tum jaano
is zulm se baaz aao

har zulm huā bātil
aur sahm ga.e qātil

kal mire shahr meñ ik zulm kuchh aisā bhī huā
raat bhar ġhairat-e-fankār ne sone na diyā

dhamkiyāñ tahrīr hoñ yā zulm kā mazmūn ho
phir ye mere dil ko ai dildār bahlātā hai ḳhat