Tags-Cruelty

aaj insāñ ne bhulā Daale haiñ yazdāñ ke karam
ham ne to zulm bhī ehsān tire jaane haiñ

hamāre sabr ne us ko thakā diyā itnā
ye mo.ajaza hai ki maqtal meñ zulm hāñptā hai

zulm ke hote amn kahāñ mumkin yaaro
ise miTā kar jag meñ amn bahāl karo

us zulm kā qissa lambā hai us jañg kī pustak bhārī hai
vo jañg jo kab kī ḳhatm huī vo jañg abhī tak jaarī hai

phir jañg huī vo jañg jise tā-hashr na bhūlegā koī
vo zulm hue jin par ab tak har shahr meñ mātam hote haiñ

bātil ke haath pe ye zulm haq vāloñ se bai.at lete the
mehmān banā kar laa.e the paanī bhī na piine dete the

is qadar zulm ibn-e-ādam par
jaise us kā koī ḳhudā hī nahīñ

jaur kā shikva na karūñ zulm hai
raaz mirā sabr ne ifshā kiyā

naala jo bulbul-e-tafsīda-jigar kā niklā
vo sabā zulm-rasīda gul-e-tar kā niklā

jo zulm chāhe rakh dil-e-'ranjūr' par ravā
de tū magar use na judā.ī kā yaar daaġh

ishq meñ ek baḌā zulm hai sābit-qadamī
vaqt ne bhī hameñ is baab meñ qudrat nahīñ dī

aaj ruuh aur dil ek zulm se ḳhajil
yaar aadmī se mil sarhadeñ utaar kar

vo zulm-o-sitam Dhaa.e aur mujh se vafā māñge
jaise koī gul kar ke dīpak se ziyā māñge

bulbul ko kaisī kaisī huiiñ āfateñ nasīb
gulchīñ ke dast-e-zulm se kyā kyā chaman luTā

ai zulm ke maato lab kholo chup rahne vaalo chup kab tak
kuchh hashr to un se uTThegā kuchh duur to naale jā.eñge

ahl-e-junūñ pe zulm hai pābandī-e-rusūm
jaada hamāre vāste kāñTā hai raah kā

har ek zulm tumheñ apnā yaad aa.egā
panāh DhūñDoge tum raat ke añdheroñ meñ

mazlūm kī sadā se na aa jaa.e inqalāb
itnā ziyāda zulm bhī Dhāyā nahīñ karo

is nazar se ki tire zulm kī tash.hīr na ho
be-qarārī meñ liye dil kā qarār aa.e haiñ

zulm aur jabr ke ahkām se ḳhāmosh magar
mohr paimān-e-mohabbat kī lagā.e hue hoñT