Tags-Cruelty

ham amn chāhte haiñ magar zulm ke ḳhilāf
gar jañg lāzmī hai to phir jañg hī sahī

sadma-sohbat-e-aġhyār na uThegā kabhī
aur jo zulm karo sab haiñ gavārā mujh ko

Tak gor-e-ġharībāñ kī kar sair ki duniyā meñ
un zulm-rasīdoñ par kyā kyā na huā hogā

hai zulm karam jitnā thā farq paḌā kitnā
mushkil hai mizāj itnā ik baar badal jaanā

ham ne taur-e-vafā nahīñ badlā
tere zulm-o-sitam bhī kam na hue

sar par havā-e-zulm chale sau jatan ke saath
apnī kulāh kaj hai usī bāñkpan ke saath

dil meñ yād-e-but-e-be-pīr liye baiThā huuñ
yaanī ik zulm kī tasvīr liye baiThā huuñ

'farāz' zulm hai itnī ḳhud-e'timādī bhī
ki raat bhī thī añdherī charāġh bhī na liyā

allāh-re fareb-e-mashiyyat ki aaj tak
duniyā ke zulm sahte rahe ḳhāmushī se ham

muttahid ho ke uThe zulm ke qadmoñ se avaam
saare gum-gashta azīzān-e-jahāñ mil hī ga.e

kal un se pūchh leñge karte ho ab bhī dil-āzārī
jahāñ tak chāheñ kar leñ zulm aaj un kā zamāna hai

har chand jāñ-balab haiñ sitam se sharīf log
laḌne ko zulm se koī tayyār bhī nahīñ

vo zulm karte haiñ ham par to log kahte haiñ
ḳhudā bure se na Daale mo.āmla dil kā

nāvak-e-zulm uThā dashna-e-andoh sambhāl
lutf ke ḳhanjar-e-be-nām se mat maar mujhe

zulm kā aadī huuñ zanjīrī mirī pahchān hai
ḳhud lagā.ī ghaat se taklīf hotī hai mujhe

dil-e-shaidā ne paayā ishq meñ me.arāj kā rutba
yahāñ akasr butoñ ke zulm TuuTe āsmāñ ho kar

dast-e-ġhaib kī tarah chhupā hai zulm kā haath sitam kā vaar
ḳhushk lahū kī bārish dekhī ham ne kūcha-e-barzan meñ

na itnā zulm kar ai chāñdnī bahr-e-ḳhudā chhup jā
tujhe dekhe se yaad aatā hai mujh ko māhtāb apnā

hadīs-e-zulm-o-sitam hai hanūz nā-gufta
hanūz mohr zabānoñ pe ḳhāmushī kī hai

maiñ tere zulm dikhātā huuñ apnā mātam karne ke liye
mirī āñkhoñ meñ aañsū aa.e tirī āñkheñ nam karne ke liye