Tags-Cruelty

munsif ko sab ḳhabar hai magar boltā nahīñ
mujh par huā jo zulm sazā ke baġhair bhī

vaqt har zulm tumhārā tumheñ lauTā degā
vaqt ke paas kahāñ rahm-o-karam hotā hai

roz dushman kā bhī is tarah na kaTiyo yā-rab
maiñ ne jis zulm se kaaTī shab-e-hijrāñ tujh bin

karbalā rakh ke hathelī pe chalā huuñ ghar se
bai.at-e-zulm haTā rakh ki maiñ jo huuñ so huuñ

mujh pe har zulm ravā rakh ki maiñ jo huuñ so huuñ
mujh ko apne se judā rakh ki maiñ jo huuñ so huuñ

siskiyāñ āh-o-fuġhāñ aur maiñ kyā kyā dekhūñ
zulm itnā bhī koī mujh pe na Dhaa.e haa.e

tumhāre zulm ke la.al-o-gohar sab
hamārā dil ḳhazāna ho gayā hai

phir se kisī pe zulm kisī ne kiyā hai aaj
dekhe haiñ ghoñsloñ meñ parinde mare hue

har taraf kūcha-e-dildār meñ zam kutte haiñ
zulm koī bhī ho arbāb-e-sitam kutte haiñ

jo chaman se duur qafas huā to maiñ aur asīr-e-havas huā
ye jo zulm ab ke baras huā yahī qahr agle bhī saal thā

na rahm tere dil-e-saḳht meñ hai ġhair-az-zulm
na mere nāla-e-jāñ-soz meñ asar ai yaar

vo zulm bhī ab zulm kī had tak nahīñ karte
āḳhir unheñ kis baat kā ehsās huā hai

ġhalatī kī ki muravvat meñ musībat jhelī
zulm bardāsht hī karnā thā na chup rahnā thā

vo jin ko shikva thā auroñ se zulm sahne kā
ḳhud un kā apnā bhī andāz jārehāna thā

lutf bhī gāh-gāh kar zulm bhī be-panāh kar
jaise bhī tujh se ho sake mujh se magar nibāh kar

kisū mashrab meñ aur maz.hab meñ
zulm ai mehrbāñ nahīñ hai durust

ab to ye reshmī poreñ bhī chhidī jaatī haiñ
ḳhud ko ab baḳhsh bhī de zulm na Dah dard na chun

ek bulbul bhī chaman meñ na rahī ab kī fasal
zulm aisā hī kiyā tū ne ai sayyād ki bas

kuchh na kahne se bhī chhin jaatā hai ejāz-e-suḳhan
zulm sahne se bhī zālim kī madad hotī hai