Tags-Cruelty

ye tujh pe falak ne zulm kiyā vo mujh se judā maiñ un se judā
ḳhushiyāñ to manāo ahl-e-jahāñ barbād mohabbat hotī hai

ham shikāyat aañkh kī palkoñ se karte kis tarah
dāstān-e-zulm varna yaad sab thī ab bhī hai

'bedār' ko dikhlā ke tū ne qatl auroñ ko kiyā
kartā hai ai zālim koī zulm-e-numāyāñ is qadar

bil-ehtimām zulm kī tajdīd kī ga.ī
aur ham ko sabr-o-zabt kī tākīd kī ga.ī

vaañ jahāñ ḳhaak ke barābar hai
qadar haft-āsmāñ zulm-shi.ār

aap ko us ne ab tarāshā hai
qahr hai zulm hai tamāshā hai

aaj tak ham ne bahut zulm kiye haiñ ḳhud par
ahd karte haiñ ki ab ḳhud ko sazā denā hai

kuchh to ham sabr o razā bhuul ga.e haiñ shāyad
aur kuchh zulm bhī sayyād bahut kartā hai

shaiḳh aur bahisht kitne ta.ajjub kī baat hai
yā-rab ye zulm ḳhuld kī āb-o-havā ke saath

mire sulūk kī sūrat badal nahīñ saktī
hazār zulm-o-sitam kar ke āzmāo mujhe

zulm mujh par shadīd kar baiThe
phir vo kār-e-yazīd kar baiThe

ham pe sau zulm-o-sitam kījiyegā
ek milne ko na kam kījiyegā

zulm Dhaao yā banā Daalo mohabbat kā safīr
ham nahīñ rahte kahīñ dab ke tamāshā kyā hai

zulm phir zulm hai baḌhtā hai to miT jaatā hai
ḳhuun phir ḳhuun hai Tapkegā to jam jā.egā

jahān-e-zulm-o-jafā ke mālik koī na ho ashk-bār kab tak
jo dil hī majbūr ho chukā ho to aañkh par iḳhtiyār kab tak

in kitāboñ ne baḌā zulm kiyā hai mujh par
in meñ ik ramz hai jis ramz kā maarā huā zehn

ham pe sau zulm-o-sitam kījiyegā
ek milne ko na kam kījiyegā

rahegā to na terā zulm par roz-e-abad tak
hamāre dard kī jāgīr rahne ke liye hai

dostoñ se to kinārā bhī nahīñ kar saktā
un kā har zulm gavārā bhī nahīñ kar saktā

ek maqtūl-e-jafā do zulm ke qābil na thā
varna dil kā mārnā āsān thā mushkil na thā