Tags-Cruelty

uThā letā huuñ jo aa.e musībat apne sar par maiñ
sahā kartā huuñ zulm-e-dil-rubā āshiq kī ḳhū ho kar

ai zulm ke maato lab kholo chup rahne vaalo chup kab tak
kuchh hashr to un se uTThegā kuchh duur to naale jā.eñge

vo kareñ zulm aur tum lab par na laao
varna gustāḳhī hai un kī shaan meñ

aadil hai us ke adl par ham ko yaqīn hai
lekin vo zulm sahne kī himmat bhī le na jaa.e

ye log zulm kamā kar shab aise sote haiñ
ḳhudā ne jaise ki roz-e-jazā banāyā nahīñ

jaise maiñ dekhtā huuñ log nahīñ dekhte haiñ
zulm hotā hai kahīñ aur kahīñ dekhte haiñ

hamesha zulm ke manzar hameñ dikhā.e ga.e
pahāḌ toḌe ga.e aur mahal banā.e ga.e

fariyād kījiye na koī zulm Dhā.iye
ik vahm hai shikast-o-zafar raqs kījiye

guuñj par zanjīr kī ik raqs bismil ne kiyā
zulm kī vahshī fazā meñ naġhmagī achchhī lagī

kareñge zulm duniyā par ye but aur āsmāñ kab tak
rahegā piir ye kab tak rahoge tum javāñ kab tak

sūraj kā zulm aur baḌhegā ye jab sunā
āñgan meñ ek peḌ lagānā paḌā hameñ

mere hālāt kā muddat se taqāzā ye hai
apne sar zulm se nafrat kā maiñ ilzām na luuñ

koī to haq-shanās ho yārab
zulm ko nā-ravāñ kahe koī

vo zulm karte haiñ ham par to log kahte haiñ
ḳhudā bure se na Daale muāmla dil kā

bad-zanī zulm-o-sitam hajv-e-sanam rusvā.ī
ishq meñ to baḌe āzār nazar aate haiñ

vo vaqt hai ki ḳhalq pe har zulm-e-nā-ravā
allāh kā naam le ke ravā hone vaalā hai

havā-e-mai-kada ye hai to faut-e-vaqt hai zulm
namāz chhoḌ deñ ab koī din gunāh kareñ

is ko kuchh to miltā hai mujh pe zulm Dhāne se
ba.az vo na aa.egā merā ghar jalāne se

jaane kyā kyā zulm parinde dekh ke aate haiñ
shaam Dhale peḌoñ par marsiya-ḳhvānī hotī hai