Tags-Dard

rūdād-e-ishq is liye ab tak na kī bayāñ
dil meñ jo dard hai vo zabāñ par bhī aa.egā

nafratoñ ne diye haiñ jo tum ko
aise har dard kī davā huuñ maiñ

ab tā.irān-e-dasht ke haiñ ham-nashīd-e-dard
karte the zamzame kabhī bustāniyoñ meñ ham

maiñ zamīñ kā dard huuñ yaaro mujhe
āsmānoñ kā pata pūchho nahīñ

dard-e-dil zaḳhm-e-jigar kā rāzdāñ koī nahīñ
vāqif-e-asrār-e-ġham āzār-e-jāñ koī nahīñ

koī in.ām-e-vafā hai ki silā hai kyā hai
us ne ye dard-e-mohabbat jo diyā hai kyā hai

dard kī dhuup Dhale ġham ke zamāne jaa.eñ
dekhiye ruuh se kab daaġh purāne jaa.eñ

maiñ ne dekhā dard kī shiddat se bechain kisī vīrāne kī samt chalā jaatā huuñ
ghane banoñ ke ba.ad khule maidānoñ meñ ret hī ret hai

dard-e-furqat meñ tirī āñkheñ faqat giilī huiiñ
merī āñkhoñ meñ miyāñ laal color aatā hai

tapte sahrā meñ kahīñ koī shajar aatā hai
dard par tark-e-sukūnat kā asar aatā hai

haal merā tujhe be-dard nahīñ gar bāvar
dekh le aa ke ki ab nau-e-digar hai ki nahīñ

paatā huuñ mazā bekalī aur dard kā aisā
paave hai koī jaise ki ārām se lazzat

raat kahtī hai ki kaTne kī nahīñ
dard kahtā hai karam-farmā.iyāñ

ham apne raftagāñ ko yaad rakhnā chāhte haiñ
diloñ ko dard se ābād rakhnā chāhte haiñ

ziist ke dard kā ehsās kabhī miT na sakā
sin ḳhushī ke bhī kaTe ik ġham-e-be-nām ke saath

kyuuñ na ho zikr mohabbat kā mare naam ke saath
umr kaaTī hai isī dard-e-dil-ārām ke saath

dard aur dard bhī judā.ī kā
aise bīmār kī duā kab tak

choT khā kar bhī muskurātā huuñ
dard-e-dil se bhī lutf uThātā huuñ

hai bahishtoñ meñ 'yaqīñ' sab kuchh va-lekin dard na.iiñ
bhar ke dil ro lījiye ye chashm-e-giryāñ phir kahāñ

kaun sā ġham hai jis kā mudāvā nahīñ kaun sā dard hai jis kā chārā nahīñ
ishq ko ġham ho pyārā to kyā kījiye dard hī dil ko bhaa.e to maiñ kyā karūñ