Tags-Dard

dard sahne ke liye sadme uThāne ke liye
un se dil apnā mujhe vāpas talab karnā paḌā

badal hī gayā bazm-e-ishrat kā rañg
mirā naġhma-e-dard kaam aa gayā

logoñ kī malāmat bhī hai ḳhud dard-sarī bhī
kis kaam kī ye apnī vasī.a-un-nazarī bhī

dard ho dil meñ to davā kiije
aur jo dil hī na ho to kyā kiije

ġham meñ kuchh ġham kā mashġhalā kiije
dard kī dard se davā kiije

chand lamhe jo mayassar hoñ sukūñ ke mujh ko
raah nikle to har ik dard kā darmāñ kar duuñ

dil kī duniyā meñ tujhe lā ke maiñ hairāñ kar duuñ
aa tujhe dard-e-mohabbat se farozāñ kar duuñ

dard se bhartā rahā zaat ke ḳhālī-pan ko
thoḌā thoḌā yūñhī bharpūr kiyā maiñ ne mujhe

sab aa.e merī ayādat ko vo bhī aayā thā
jo sab ga.e to mirā dard-āshnā bhī gayā

yādoñ ko sulā detā hai saa.e meñ shajar ke
vo hausla-e-dard-e-rasā.ī nahīñ detā

shaad har pal haiñ ki ham ne dil ko
ḳhūgar-e-dard banā rakkhā hai

kisī dard-mañd kī huuñ sadā kisī dil-jale kī pukār huuñ
jo bigaḌ gayā vo nasīb huuñ jo ujaḌ ga.ī vo bahār huuñ

mere lahū kā zā.iqa chakhtā rahā thā dard
tanhā.iyāñ thiiñ raat jahāñ kam bahut hī kam

ik dard kā phailā huā sahrā hai ki maiñ huuñ
ik mauj meñ aayā huā dariyā hai ki tum ho

dard ko 'āzar' duā maiñ kyuuñ na duuñ
dard hī se shā.erī zinda rahī

zulf ko dast-e-hinā.ī se jo chhūtā hai vo shoḳh
to giraftār vahīñ dard-e-hinā hotā hai

is dard-e-judā.ī se kahīñ jaan nikal jaa.e
'āzurdā' mire haq meñ zarā yuuñ bhī duā kar

kaun se zaḳhm kā khulā Tāñkā
aaj phir dil meñ dard hotā hai

muskurātā huuñ to āñkhoñ meñ machal jaate haiñ ashk
dard meñ ghul-mil ga.ī hai ek harjā.ī kī baat

dard aisā hai ki jī chāhe hai zinda rahiye
zindagī aisī ki mar jaane ko jī chāhe hai