Tags-Dard

mauja-e-ashk se bhīgī na kabhī nok-e-qalam
vo anā thī ki kabhī dard na jī kā likkhā

dard bhī mauj ke mānind safar karte haiñ
achchhā rahtā hai palak par koī taarā honā

umr-bhar dard ke rishtoñ ko nibhāne se rahā
zindagī meñ to tire naaz uThāne se rahā

umr kī uktāhaTeñ aur dard ke pahlū tamām
jab se 'khullar' tū milā hai aa.ina achchhā lagā

rog bhī tū ne lagāyā hai anokhā 'shahzād'
ab kahāñ se tire is dard kā daarū aa.e

dard meñ Duubī huī raakh meñ nahlā.ī huī
raat yuuñ aa.ī hai jaise koī sādhū aa.e

dard-e-furqat kī go davā hai visāl
is ke qābil bhī har mizāj nahīñ

hujūm-e-ġham se milī hai hayāt-e-nau mujh ko
hujūm-e-dard se paayā hai hausla maiñ ne

'saif' ye dard se ma.amūr ḳharābe dil ke
kitnī mushkil se basā.e haiñ tumheñ kyā ma.alūm

tum agar chhoḌ ga.e mujh ko to yuuñ taḌpūñgā
saarī duniyā ko ġham-e-dard-e-judā.ī dūñgā

kyā terā mudāvā ho dard-e-shab-e-tanhā.ī
chup rahiye to barbādī kahiye to gilā hogā

gulchīñ se kabhī maiñ suntā huuñ bulbul se kabhī maiñ kahtā huuñ
is dard-sarī kā baa.is hai dilchasp fasāna phūloñ kā

ishq jo dil meñ dard ho ke rahā
ḳhud usī dard kī davā haiñ ham

sā.at-e-dard farozāñ hai bahā leñ aañsū
TūTne ko hai kaḌā vaqt shakebā.ī kā

jitnā hotā hai kam āsār-e-ḳhushī kā lamha
dil mirā dard se utnī bhī na mohlat māñge

dard sā uTh ke na rah jaa.e kahīñ dil ke qarīb
merī kashtī na kahīñ ġharq ho sāhil ke qarīb

insān to dukh-dard ke sahrāoñ meñ gum hai
ye qāfila ḳhushiyoñ ke Dagar tak nahīñ pahuñchā

ek kāñTe kī khaTak se dil mirā ābād thā
vo gayā to dil se mere dard kī rāhat ga.ī

tumhārī bazm se tanhā nahīñ uThā 'ḳhurshīd'
hujūm-e-dard kā ik qāfila rikāb meñ thā

ai jān-e-'sirāj' ek ġhazal dard kī sun jā
majmūa-e-ahvāl hai dīvān hamārā