Tags-Dard

ye nahīñ hai ki maiñ is dard se āgāh nahīñ
tū ġham-e-dahr pe rotī hai patā hai mujh ko

aah dil se lab tak aa saktī nahīñ
dard hotā hai to hone dījiye

kaun dil hai ki tire dard meñ bīmār nahīñ
kaun jī hai ki tire ġham meñ giraftār nahīñ

jab dard-e-dil nahīñ rahā to yuuñ lagā mujhe
goyā ki zindagī kā sahārā nahīñ rahā

bāda-gardān-e-ajam vo arabī merī sharāb
mire sāġhar se jhijakte haiñ mai-āshām abhī

azāb-e-dard pe nāzāñ haiñ ahl-e-dard magar
nashāt-e-dard mayassar nahīñ to kuchh bhī nahīñ

hai hijr-e-dostāñ bhī karam dard-e-jāñ-fazā
āñkhoñ meñ jo base the vo ab dil meñ bas ga.e

ise tahzīb-e-ġham kā naam ahl-e-dard dete haiñ
mire aañsū kabhī dāman tumhārā nam nahīñ karte

dard betāb hai alfāz meñ Dhalne ke liye
rāsta chāhiye sab ko hī nikalne ke liye

lazzat-e-dard-e-alam hī se sukūñ aa jaa.e hai
dil mirā un kī navāzish se to ghabrā jaa.e hai

sar meñ saudā dil meñ dard ā.ankhoñ meñ ashk
bastiyāñ ham ko basānī aa ga.iiñ

ḳhushbū se ladī bahār meñ bhī
ham dard se bahra-var rahe haiñ

kahāñ maiñ kahāñ dāstāñ kā taqāzā mire zabt-e-dard-e-nihāñ kā hai kahnā
phir us par ye tākīd bhī hai barābar na kahnā purānī kahānī kaho to

sunā bhī kabhī mājrā dard-o-ġham kā kisī dil-jale kī zabānī kaho to
nikal aa.eñ aañsū kaleja pakaḌ lo karūñ arz apnī kahānī kaho to

anjum-afshāñ ho ga.ī jab merī chashm-e-ashk-bār
dard kī tiira fazāoñ meñ charāġhāñ ho gayā

ho ga.ī jab zaḳhma-zan dard-e-mohabbat kī ḳhalish
har nafas ik naġhma-e-sāz-e-rag-e-jāñ ho gayā

hai kahāñ vo samāñ
dard ke nuur meñ dhul ke nikhre hue jism-o-jāñ

chubhtī nahīñ haiñ dard kī be-ḳhvāb sūiyāñ
añgāre ab jagāo to shāyad asar leñ ham

us ke aane pe bhī nahīñ aa.ī
dard meñ kuchh kamī nahīñ aa.ī

jab bhī do aañsū nikal kar rah ga.e
dard ke unvāñ badal kar rah ga.e