Tags-Dard

dil kī dahlīz pe jab shaam kā saaya utrā
ufuq-e-dard se siine meñ ujālā utrā

yaad ik ġham hai ki fariyād fusūñ hai ki junūñ
dard ke rishte haiñ mushkil se numāyāñ hoñge

dard kā silsila hai jahāñ tak
dil kī jāgīr hogī vahāñ tak

ḳhū-e-vafā milī dil-e-dard-āshnā milā
kyā rah gayā hai aur jo nā māñgeñ ḳhudā se ham

jigar meñ dard dil meñ Tiis dam ghuTne lagā apnā
bhalā ham ek ghar meñ aur do bīmār rahne deñ

tirā qalaq bhī tirā dard bhī tirā ġham bhī
hamāre ishq ke itne gavāh haiñ maujūd

hayāt kyā hai ki afsāna dard-nākī kā
fasāne dard ke har dam sunā.e jaate haiñ

dard-e-firāq 'ātish' taḌpā rahā hai ham ko
ik haath dil sambhāle hai ik jigar sambhāle

roz-o-shab kis pe baraste haiñ sitam ke patthar
dard se kaun huā chor tumheñ kyā ma.alūm

tirī yaad mujh se bahut laḌī mire añg añg meñ zaḳhm hai
maiñ taḌaptā rahtā huuñ dard se tujhe fikr merī zarā nahīñ

karb se aa.ī hai naināñ meñ ye nīlāhaT bhī
dard kī niilī rageñ dil meñ rakhā karnā thā

tez hai aaj dard-e-dil saaqī
talḳhi-e-mai ko tez-tar kar de

koī davā na de sake mashvara-e-duā diyā
chāragaroñ ne aur bhī dard dil kā baḌhā diyā

lamha lamha dard Tapaktā rahtā hai
jaane andar kaun sisaktā rahtā hai

bedard mujh se sharh-e-ġham-e-zindagī na pūchh
kaafī hai is qadar ki jiye jā rahā huuñ maiñ

tere milne kī ḳhushī meñ koī naġhma chheḌūñ
yā tire dard-e-judā.ī kā gilā pesh karūñ

patthar jaisī duniyā hai ḳhud-ġharzī hai
us ko kyuuñ kar dard sunāne lagte haiñ

ye dard hai terā hī ki hai jaan se shīrīñ
har dard meñ zālim ye mazā ho nahīñ saktā

na vo ayādat-o-taskīñ na vo dil-e-ranjūr
na ab vo dard-e-mohabbat na vo davā.eñ rahīñ

habs to dil meñ thā lekin aañkh tap kar rah ga.ī
raat saarā shahr Duubā dard kī purvā.ī meñ