Tags-Dard

TuuT ke hī ehsās mujhe ye ho paayā
dard abhī kuchh aur sahā jā saktā hai

kaise be-dard haiñ ki joḌte haiñ
naram alfāz jin meñ rishta nahīñ

kho jā.ūñ kahīñ tīra-ḳhalāoñ meñ to kyā ho
ḳhud ko jo tire dard ke mehvar se nikālūñ

'zeb' mujhe Dar lagne lagā hai apne ḳhvāboñ se
jāgte jāgte dard rahā kartā hai mire sar meñ

maiñ kahūñgā harf-e-talab kuchh aise kamāl se
mirā dard mere savāl meñ nahīñ aa.egā

dard vahshat ranj-o-ġham tanhā.iyāñ shām-e-alam
jo mujhe ghere thiiñ un ko gher kar aayā huuñ maiñ

haañ bahut mushkil to hai lekin ye nā-mumkin nahīñ
dard kī tuġhyāniyoñ meñ tair kar aayā huuñ maiñ

mat tahzīb tamaddun kī tum ham se baat karo
dil kā dard chhalak jā.egā varna āñkhoñ se

ham dard ke maare hī garāñ-jāñ haiñ vagarna
jiinā tirī furqat meñ kuchh āsāñ to nahīñ hai

aap jab bhī kabhī muskurāne lage
dard jitne the mere suhāne lage

hai in kī pursish-e-dard-o-alam meñ bhī pinhāñ
vo ik kasak ki samajhte nahīñ jise ġham-ḳhvār

kabhū saudā kabhū vahshat kabhū ġhaflat kabhū dard
aag lag jaa.e mohabbat ke in āzāroñ ko

kaam hai un kā jafā vo bā-vafā kahne ko haiñ
dete haiñ jo dard-e-dil ahal-e-shifā kahne ko haiñ

lahū meñ tairne lagtā hai jab vo chāñd sā chehrā
havā-e-dard siine meñ koī neza chubhotī hai

jin kā da.avā thā mudāvā hogā sab ke dard kā
ab to un kī zaat par bhī tabsire karte haiñ log

paḌho ibārat-e-taḳhlīq-e-dard chehre par
likhī hai karb kī rūdād zard chehre par

de ke ik sho.ala-e-guftār jagāyā hai mujhe
ahd-e-ḳhvābīda ne be-dard banāyā hai mujhe

kaun sā bhūlā-bisrā ġham thā jo aayā hai yaad
rah rah kar phir dil meñ uTThe dard kī mīThī lahar

yā alam-koshī rahī yā ḳhud-farāmoshī rahī
dil kisī din dil na thā yā dard thā yā kuchh na thā

shab ko mirī chashm-e-hasrat kā sab dard-e-dil un se kah jaanā
dāñtoñ meñ dabā kar hoñT apnā kuchh soch ke us kā rah jaanā