Tags-Dard

dushman se bhī haath milāyā jā saktā hai
dard kā bhī to lutf uThāyā jā saktā hai

dam-e-ḳhvāb-e-rāhat bulāyā unhoñ ne to dard-e-nihāñ kī kahānī kahūñgā
mirā haal likhne ke qābil nahīñ hai agar mil ga.e to zabānī kahūñgā

bīmār-e-dard-e-hijr kī pursish se fā.eda
achchhe haiñ yā bure haiñ tumhārī balā se ham

ka.aba bhī ham ga.e na gayā par butoñ kā ishq
is dard kī ḳhudā ke bhī ghar meñ davā nahīñ

tire bhī siine meñ apnoñ kā dard jāgegā
dayār-e-ġhair meñ koī to shaam kar tanhā

ghuT ke mar jaane se pahle apnī dīvār-e-nafas meñ dar nikālo
dard ke vīrāñ khañDar se manzar-e-be-nām ko bāhar nikālo

namī se gal bhī sakte haiñ sharar se jal bhī sakte haiñ
bharosā kar rahī haiñ kyoñ 'siyā' be-dard kāġhaz par

chalo maanā ki kah lene se dukh halkā hī hotā hai
magar kuchh hī paloñ meñ itnā saarā dard kāġhaz par

qalam meñ ashk bhar kar likh rahī huuñ dard kāġhaz par
bikhere jā rahī huuñ hasratoñ ko sard kāġhaz par

ishq meñ dard se hai hurmat-e-dil
chashm ko aabrū hai aañsū se

jab fasl kaTī to kyā dekhā
kuchh dard ke TuuTe gajre the

dekh kar lakīroñ ko ye kahā nujūmī ne
dard hī muqaddar hai zā.icha na badlegā

maiñ vo saaf hī na kah duuñ jo hai farq mujh meñ tujh meñ
tirā dard dard-e-tanhā mirā ġham ġham-e-zamāna

ġharq-e-ḳhūnāb hone vaalī hai
dard kī naav dekhte kyā ho

'zākir' nashist-e-dard maqām-e-ḳhirad bhī hai
mansūb is ḳhirad se hai bīnā.iyāñ tamām

film taqsīm-e-virāsat kā yahī the-end hai
dard kuchh aisā thā jo gardan dabāne se gayā

dard kā sāġhar bhī saaqī merī qismat meñ na thā
shauq meñ karnā paḌā āḳhir lahū paanī mujhe

jis taraf baiThte the vasl meñ aap
usī pahlū meñ dard rahtā hai