Tags-Dard

dard kī beḌī shaam se hī baj uThtī hai
maiñ to us ke firāq meñ aur niDhāl huā

baḌe shabāb pe dard-e-firāq-e-mastī hai
na ho sharāb to pahroñ ghaTā barastī hai

dard ye dil meñ uThā raat ki ho garm-e-tapish
uḌ gayā suune falak meñ par-e-ahrār lagā

be-dard tū kyūñki rah sakegā
ye hazrat-e-'dard' kā 'asar' hai

yā hazrat-e-andalīb baḳhshish
ye tere hī dard kā asar hai

yuuñ dard ba-jān-o-dil samāyā
har nāla-o-āh kārgar hai

hamārī tabāhī meñ kuchh us kā ehsāñ bhī hai
jo dard in dinoñ vaj.h ārā.ish-e-jāñ bhī hai

kaam jab kuchh na banā ishq kī nākāmī se
dard ne aap ko sharminda-e-be-dād kiyā

dil meñ lagī hai aag jigar par asar nahīñ
ye dard aur hai jo idhar hai udhar nahīñ

mire haath meñ tire naam kī vo lakīr miTtī chalī ga.ī
mire chāra-gar mire dard kī hī vazāhatoñ meñ lage rahe

ham haiñ vo bekas-o-be-yār ki baiThe baiThe
apnā dukh-dard kahā karte haiñ dīvāroñ se

raah tārīk hai aur duur hai manzil lekin
dard kī sham.eñ jalā leñge tum aao to sahī

haiñ ghaao dil par apne teġh-e-zabāñ se sab kī
tab dard hai hamāre ai 'mīr' har suḳhan meñ

ek dard kī lazzat barqarār rakhne ko
kuchh latīf jazboñ kī ḳhuuñ se ābyārī kī

qalb o zamīr be-his o be-jān ho ga.e
duniyā ḳhulūs o dard se mahrūm ho ga.ī

ga.e zamānoñ kī dard kajlā.ī bhūlī bisrī kitāb paḌh kar
jo ho sake tum se aane vaale dinoñ ke rañgīn ḳhvāb likhnā

chārasāzo mirā ilaaj karo
aaj kuchh dard meñ kamī sī hai

dard-mandī bhī mohabbat bhī ravādārī bhī
kaam kitnā dil-e-nākām se vābasta hai

hama-tan kabhī hue dard-o-ġham hama-tan kabhī hue sabr ham
kabhī aap apnā maraz hue kabhī aap apnī davā hue

jo havā-e-dard bikhar ga.ī nazar un kī saaf badal ga.ī
jo asīr-e-halqa--nāz the vo qatīl-e-teġh-e-adā hue