Tags-Dard

'mus.hafī' kyūñke chhupe un se mirā dard-e-nihāñ
yaar to baat ke andāz se pā jaate haiñ

ain-mumkin hai kisī tarz-e-adā meñ aa.e
qissa-e-dard-e-vafā saut-o-sadā meñ aa.e

dard kā jab tak mazā hāsil na thā
dil kahe jaane ke qābil dil na thā

zindagī mehrbāñ nahīñ to phir
maut kyuuñ dard-āshnā hogī

taḌap ke dard se fariyād ko jo lab khole
sitam shi.ār zamāne pe ye garāñ guzrā

zaḳhm patta patta hai dard Daalī Daalī hai
ai mire chaman āḳhir kaun terā maalī hai

jī aa rahā dīda-e-tar meñ mujhe dam lene kī taab nahīñ
zo.af ek taraf dard ek taraf aur kāhish-e-tāqat ek taraf

zindagī roz nayā dard sunātī hai magar
apne aañsū kabhī chhūne nahīñ detī mujh ko

dushvāriyoñ ko ishq ne āsāñ banā diyā
ġham ko surūr dard ko darmāñ banā diyā

rifāqat ahl-e-ġham kī ik nashāt-e-muḳhtalif hai
jo rakhte ho jigar meñ dard kā ghaao to aao

lab sī ke mire tū ne diye faisle saare
ik baar to bedard sunā chāhiye mujh ko

siyah kiye haiñ varaq maiñ ne is tavaqqo.a par
kabhī to hogī mire dard kī pazīrā.ī

sameT kar mujhe rakh le ki terā dard huuñ maiñ
tirā hī aib huuñ mujh ko chhupā ke ghar le jā

shiddat-e-dard-e-jigar ho ye zarūrī to nahīñ
aur phir aañkh bhī tar ho ye zarūrī to nahīñ

dard ko aañkh banāyā hai to phir jā ke kahīñ
dil pe likkhī huī tahrīr nazar nazar aa.ī hai

maiñ ne jitne bhī savāloñ meñ use dekhā hai
zindagī dard kī tasvīr nazar aa.ī hai

apnī hī zaat ke mahbas meñ samāne se uThā
dard ehsās kā siine meñ dabāne se uThā

kitne ḳhvāb sameTe koī kitne dard kamā.egā
paimāne kī had hotī hai āḳhir bhar hī jā.egā

amiir imaam mubārak ho fat.h-e-ishq tumheñ
ye dard-e-māl-e-ġhanīmat hai sab tumhārā huā

phir aaj mere dard ne mujh ko manā liyā
koī kisī aziiz se kab tak ḳhafā rahe