Tags-Dard

jānte haiñ ki mohabbat kā maraz hai mujh ko
pūchh lete haiñ magar dard kahāñ hai jānāñ

vo karam ho ki sitam ek ta.alluq hai zarūr
koī to dard-e-mohabbat kā amiiñ hotā hai

dil-e-ḳhilqat-e-ḳhudā ko sanamā jalā na chandāñ
ki falak ke paar pahuñche taf-e-āh-e-dard-mandāñ

zindagī bhar jo lab pe aa na sakī
dard-o-ġham kī vo dāstāñ ham the

chehre pe mire dard kī parchhā.īñ jo dekhī
bedard mire ghar se pareshān gayā hai

dard par hai us ke chaḌhne aur utarne kā madār
dil vo dariyā hai ki hai pāyāb bhī mañjdhār bhī

ishq ko dījiye junūñ meñ faroġh
dard se dard kī davā kījiye

vo haiñ paas ab bas kar ai dard-e-dil
kare kuchh maraz bhī davā kā lihāz

ġham-e-judā.ī meñ aisī kahāñ thī lazzat-e-dard
unheñ bhī mujh se bichhaḌne kā dukh huā hogā

is kā phan maiñ ne bahut der talak kuchlā thā
rah gayā saañp tire dard kā zinda kaise

ham ne jab dard bharī apnī kahānī likkhī
log kahne lage rūdād purānī likkhī

dil ke har parde se aatī thiiñ sadā.eñ dard kī
barbat-e-hastī pe tum ko naġhma-ḳhvāñ samjhā thā maiñ

us meñ bhī kuchh raaz hai varna dayār-e-husn meñ
dard-mandoñ kā koī ġham-ḳhvār pahle to na thā

jaane kis lamha-e-pur-dard kī yaad aa.ī hai
rote rote yūñhī barbād na kar luuñ ḳhud ko

kisī kā dard hai aur apnā dil hai
ye shīsha sañg se Takrā gayā hai

siine meñ hai us ke soz agar shaitāñ ke qadam le āñkhoñ par
begāna-e-dard-e-dil hai agar jibrīl kī bhī tāzīm na kar

tum se chhoḌī na ga.ī rāh-e-vafā phir bhī 'hayāt'
kitne be-dard mile kitne sitamgar nikle

milā hameñ bas ek ḳhudā
aur vo bhī bedard milā

tum hī samajh lo tum ho masīhā
maiñ kyā jānūñ dard kidhar hai

jise paalā thā ik muddat tak āġhosh-e-tamannā meñ
vahī baanī huā mere ġham o dard o aziyyat kā