Tags-Dard

maiñ huuñ majbūr aa.ina to nahīñ
dard ko ḳhushnumā dikhātā kyā

apnī anā kī ret pe apne usuul pe
paalā vo dard jis kī davā se nahīñ banī

abhī to ham-nafasoñ ko hai vahm-e-chāragarī
huī na dard meñ phir bhī kamī to kyā hogā

dard-e-dil kaun āzmātā hai
kaun be-chainiyāñ baḌhātā hai

dard ke mausam kā kyā hogā asar anjān par
dosto paanī kabhī ruktā nahīñ Dhalvān par

jo dukhe dil haiñ unheñ daulat-e-darmāñ ho atā
dard ke haath meñ mat kāsā-e-nādārī de

ik ḳhaas ināyat hai ki dete nahīñ mujh ko
vo dard ki jo panja-e-tadbīr meñ aave

shaam lahakte jazboñ vaalī 'fikrī' kab kī raakh huī
chāñd-rū pahlī kirnoñ vaalā dard kā maarā lagtā hai

yuuñ to hazār dard se rote haiñ bad-nasīb
tum dil dukhāo vaqt-e-musībat to baat hai

ab daur-e-āsmāñ hai na daur-e-hayāt hai
ai dard-e-hijr tū hī batā kitnī raat hai

kabhī mere dil meñ tū dekhnā ki jahāñ tamām simaT ga.e
kare zikr jis kā har ik zabāñ mire dard kā vo shabāb hai

mirā dard-e-dil hai ravāñ-davāñ mirā zaḳhm-e-dil bhī gulāb hai
mirī ḳhushbuoñ sī hai dāstāñ ye jahān merī kitāb hai

bas itnā bol rahī chāragar kī ḳhāmoshī
balā kā dard dil-e-nā-tavāñ se guzrā hai

bulbul kī ḳhush-navā.ī kā baa.is hai ishq-e-gul
dil meñ jo dard hai to maza bhī suḳhan meñ hai

chāra-gar de mujhe davā aisī
dard ho jaa.e chāra-gar apnā

rahtī hai siine hī par tasvīr-e-dost
hai ye ta.avīz ik barā-e-dard-e-dil

ab taḌapne meñ mazā miltā nahīñ
ho chalī jaañ āshnā-e-dard-e-dil

ham marīzoñ kā nahīñ mumkin ilaaj
lā-davā haiñ mubtalā-e-dard-e-dil

jaan hī jaa.e to jaa.e dard-e-dil
ik yahī hai ab davā-e-dard-e-dil

khā ke kuchh so rahte haiñ hirmāñ-nasīb
ek ye bhī hai davā-e-dard-e-dil