Tags-Dard

chhupā.e āñkhoñ meñ aañsū diloñ meñ dard-o-fuġhāñ
vafā shanās yūñhī tere dar se guzre haiñ

ḳhudā kare na vo guzreñ kisī kī nazroñ se
jo sail-e-dard-o-balā mere sar se guzre haiñ

maiñ banātā huuñ taḳhayyul ke qalam se paikar
merī tahrīr mire dard kī tasvīr meñ aa

tū mere dard se āgāh yuuñ na hovegā
ilāhī choT kisī din tire bhī dil ko lage

āḳhir-e-shab dard kī TuuTī huī baisākhiyāñ
āḌe-tirchhe zāviye mausam ke chehre par bhī the

dard-havā kā pīchhā karnā sab ke bas kī baat nahīñ
apnā pīchhā karte karte dost bhī uktā jā.eñge

kaif o mastī 'shujā.a' falak tak hai
dard yuuñ qalb meñ machalte haiñ

ai nāseh chashm-e-tar se mat kar aañsū paak rahne de
are bedard rone meñ mujhe bebāk rahne de

ham the ḳhushiyoñ ko bechne nikle
dard-o-ġham kī ḳharīd kar baiThe

bām-o-dar ḳhāmushī ke bojh se chuur
āsmānoñ se jū-e-dard ravāñ

sho.ala-e-dard liye dil-zadagāñ nikle haiñ
ab koī aag na.ī barq-o-sharar meñ rakhiye

ye hai shaam mausam-e-dard kī ye hai sub.h chehra-e-zard kī
hai bahār par ġham-e-zindagī koī dil-ḳhizāñ ho to le ke aa

jo ho zauq-e-dard kā ye samāñ to uchhāl de koī āsmāñ
tire dāġh-e-dil mah-o-mehr meñ kahīñ kahkashāñ ho to le ke aa

bayān-e-shauq-e-safar ahl-e-dard kā hai bahut
magar nishān sar-e-rahguzar nahīñ miltā

apne ālām-o-masā.ib kā vahī darmāñ hai
dard kā had se guzarnā hī davā aaj bhī hai

dard-e-dil aaj bhī hai josh-e-vafā aaj bhī hai
zaḳhm khāne kā mohabbat meñ mazā aaj bhī hai

dard juuñ sham.a mile hai shab-e-hijrāñ mujh ko
khā ga.e ro-ro mire dīda-e-giryāñ mujh ko

zindagī dard-e-dil se katrā kar
dard-e-sar ban ga.ī bashar ke liye