Tags-Dard

be-zāriyoñ ko dasht-e-nafas meñ sameT kar
dard-āshnā junūn ke ahkām do hameñ

raat kī shāḳh hilī aur gire piile phuul
dard ke peḌ ne yuuñ ham ko kamā.ī dī hai

na suno mere naale haiñ dard-bhare dār-o-asare āh-e-sahare
tumheñ kyā jo koī martā hai mire ai dushman-e-jāñ be-dād-gare

kaun be-dard chhīn letā hai
mere phūloñ kī bholī-bhālī hañsī

'nushūr' aap ke ash.ār-e-dard kyā kahnā
kisī kī bazm-e-mohabbat meñ gaa.e jaate haiñ

lazzat dard farishtoñ ko 'razā' kyā ma.alūm
na huā ishq kā āzār bashar se pahle

zamīñ jaise kī ātish-fishāñ ko saath liye
yuuñ jī rahā huuñ maiñ dard-e-nihāñ ko saath liye

dard ke saaz pe ham ne bhī ġhazal-ḳhvānī kī
giit likkhe haiñ tire lab ke tamāshā kyā hai

martā bhalā hai zabt kī tāqat agar na ho
kitnā hī dard-e-dil ho magar chashm-e-tar na ho

vo ashk ai dard-e-dil āñkhoñ meñ hote
jo dāġh-e-ma.asiyat dāman se dhote

mazkūr rahe hai dard-o-ġham kā
din raat yahī fasāna hai yaañ

chhupā liyā hai maiñ ne saarā dard apnī ruuh meñ
tasalliyoñ kā zāhirī naqāb koī le gayā

talḳh tanhā.ī kā ik dard liye chehre par
le ke phirtā huuñ maiñ zaḳhmoñ ke diye chehre par

rahegā to na terā zulm par roz-e-abad tak
hamāre dard kī jāgīr rahne ke liye hai

mujh par bhī kuchh karam nigah-e-neshtar-navāz
maiñ bhī huuñ ek dard bharā dil liye hue

vo mast-o-mahv apne faroġh-e-nashāt meñ
maiñ mutma.in huuñ dard bharā dil liye hue

pur-dard jo dil meñ unheñ roko na fuġhāñ se
hote haiñ ye ḳhāmosh to karte haiñ fuġhāñ aur

do balā.eñ aaj kal apnī sharīk-e-hāl haiñ
ik balā-e-dard-e-duniyā ik balā-e-dard-e-dil

us ne ham se ḳhairiyat pūchhī to ham chup ho ga.e
koī lafzoñ meñ bhalā kaise batā.e dard-e-dil

dard-e-dil ne to hameñ behāl kar ke rakh diyā
kaash koī aur ġham hotā bajā.e dard-e-dil