Tags-Dard

vo jo mujh se ḳhafā nahīñ hotā
dard had se sivā nahīñ hotā

matā-e-dard ko sāhab shu.ūr kho baiThe
sabāt-e-azm ko mard-e-ġhuyūr kho baiThe

sochā hai maiñ dard chhupā lūñgī apne āsānī se
siine meñ jāsūs chhupā hai ye kyuuñ bhuul rahī huuñ maiñ

un kā barbād-e-karam kahne ke qābil ho gayā
dard pahlū meñ jahāñ bhī thā vahīñ dil ho gayā

dard samjhe na koī dard kā darmāñ samjhe
log vahshat ko ilāj-e-ġham-e-daurāñ samjhe

munāsib hai kuchh khā ke mar jaao 'barq'
yahī dard-e-furqat kī tadbīr hai

kis se ai 'joshish' kahūñ maiñ dard-e-dil
mere us ke bolnā mafqūd hai

āñkhoñ meñ dard-mandī hoñToñ pe uzr-ḳhvāhī
jānāna vaar aa.ī shām-e-firāqyāra

dard ko falsafe kī lorī dī
zaḳhm par shā.irī kā phāhā rakkhā

dard-e-hijrat ke satā.e hue logoñ ko kahīñ
sāya-e-dar bhī nazar aa.e to ghar lagtā hai

chaman kā dard hai jis dil meñ to chāhe kahīñ uTThe
use apnī hī shāḳh-e-āshiyāñ ma.alūm hotī hai

dard-e-sar ke ilaaj ko vahshat
khīñch kar le chalī pahāḌoñ meñ

dil kahāñ kā jo dard-e-dil hī na ho
sar kahāñ kā jo dard-e-sar hī nahīñ

jis meñ saudā nahīñ vo sar hī nahīñ
dard jis meñ nahīñ jigar hī nahīñ

kabhī zaḳhmoñ kā bhī ḳhanda-e-gul kā mausam
ham pe khultā rahā ik dard kī tafsīr ke saath

ik tirī yaad ki har saañs ke nazdīk rahī
ik tirā dard ki chaspāñ rahā taqdīr ke saath

dard terā mirā na ho yaksāñ
dard hī hai alāhada kyā hai

ishrat-e-hastī pe thī 'mahtāb' duniyā kī nazar
dil ko kyā kahiye ki us ne dard apnā.e bahut

tirā dil ho dard se āshnā to ye naala ġhaur se sun zarā
baḌā jāñ-gusil hai ye vāqi.a ye fasāna-e-jam-o-kai nahīñ

jab use dost kahā hai tum ne
us ke dukh dard meñ shirkat karnā