Tags-Dard

jise sun ke ruuh mahak uThe jise pī ke dard chahak uThe
tire saaz meñ vo sadā nahīñ tire mai-kade meñ vo mai nahīñ

betāb tere dard se the chārāgar 'hafīz'
kyā jāniye vo dard ke maare kahāñ ga.e

ab ḳhushī hai na koī dard rulāne vaalā
ham ne apnā liyā har rañg zamāne vaalā

mire paas kyā vo aate mirā dard kyā miTāte
mirā haal dekhne ko lab-e-bām tak na pahuñche

thoḌī sī aur zaḳhm ko gahrā.ī mil ga.ī
thoḌā sā aur dard kā ehsās ghaT gayā

dekhnā ḳhvāb-zamīneñ na huuñ banjar 'qayyūm'
apnā ye dard ye āshob na marne denā

rū-ba-rū un ke koī harf adā kyā karte
dard to ham ko chhupānā thā sadā kyā karte

kaifiyat dard-e-tamannā kī vahī hai ki jo thī
terā iz.hār-e-vafā bhī dam-e-īsā na huā

ġhāfiloñ ko kyā sunā.ūñ dāstān-e-ishq-e-yār
sunñe vaale milte haiñ dard-āshnā miltā nahīñ

nuqūsh-e-dard tarāshe ġhamoñ ke rañg bhare
maiñ jaise dast-e-mashiyyat meñ koī patthar thā

dard mīThī zabāñ pe rakh aa.e
tiir ya.anī kamāñ pe rakh aa.e

uff na kī dard-e-hijr zabt kiyā
ai dil-e-be-qarār kyā kahnā

dard-e-dil likhūñ kab tak jā.ūñ un ko dikhlā duuñ
uñgliyāñ figār apnī ḳhāma ḳhūñ-chakāñ apnā

dard jaatā nazar nahīñ aatā
haal achchhā nazar nahīñ aatā

koī to dard hai aisā jo khīñchtā hai use
mire hī dil kī taraf lauT kar vo aayā kyuuñ

dard-mandoñ se taġhāful kab tak
us ko ehsās dilāyā jaa.e

dard aisā diyā ehsās-e-vafā ne ham ko
na davā ne hī shifā dī na duā ne ham ko

isī ummīd par ham tālibān-e-dard jiite haiñ
ḳhoshā dard de ki terā aur dard-e-lā-davā hogā

mere siine meñ rakh gayā har dard
merā hamdard kis qarīne se

dard kī sūrat meñ vo umda sā tohfa de gayā
bevafā duniyā meñ jiine kā sahārā de gayā