Tags-Dard

baaqī hai ek dard kā rishta so vo bhī ab
kis se nibhā.eñ ham koī dard-āshnā to ho

mere ghar koī ḳhushī aatī to kaise aatī
umr-bhar saath rahā dard mahājan kī tarah

muḳhtasar hāl-e-dard-e-dil ye hai
maut ai chāragar nahīñ aatī

phir achānak ek dard ne jaise tamācha maarā
na jaane kahāñ se himmat kā sailāb aaya

dil ke sunsān jazīroñ kī ḳhabar lā.egā
dard pahlū se judā ho ke kahāñ jā.egā

dil ne Thokar khā ke samjhā hadisā kyā chiiz hai
ġham kise kahte haiñ dard-e-lā-davā kyā chiiz hai

hikāyat-e-dil-e-dard-āshnā sunā.ūñgā
tirī nazar se mujhe jur.at-e-bayāñ to mile

kuchh na pūchh intihā-e-rañj-e-firāq
dard pā kar davā ko bhuul ga.e

maiñ intizār kī taqdīs tū shikast-e-vafā
tū dā.eroñ kā makīñ dard-e-lā-makāñ sā maiñ

hisār-e-dard sā maiñ sa.ī-e-rā.egāñ sā maiñ
ye sho.ala sho.ala fazā aur dhuāñ dhuāñ sā maiñ

dard-e-jigar kī tum pe musībat paḌī nahīñ
tum to kahoge ishq kī manzil kaḌī nahīñ

lahū rone lageñge sāz-e-ishrat chheḌne vaale
are ye dard āvāz-e-shikast-e-shīsha-e-dil meñ

dil meñ ik dard kā tūfān chhupā.e rakkhā
aañkh se raaz ko ifshā kabhī hone na diyā

aa ga.e lo vo ayādat ke liye ḳhud aa ga.e
ho gayā bīmār dard-e-hijr achchhā ho gayā

pahle dard-e-dil pe kahte the ki ye kyā ho gayā
ab ye kāvish hai ki kyuuñ bīmār achchhā ho gayā

aur tadbīr ko nahīñ kuchh daḳhl
ishq ke dard kī davā hai ishq

to jāniyo muqarrar us ko 'surūr' āshiq
kuchh dard kī sī hālat jis ke suḳhan se nikle

the kitne achchhe log ki jin ko apne ġham se fursat thī
sab pūchheñ the ahvāl jo koī dard kā maarā guzre thā

kar na sukūn-e-dil kā ġham hādi-e-mubtalā zarā
ishq kī bārgāh meñ dard kī kuchh kamī nahīñ

dard kī ik chipchipātī goñd meñ
DevḌhiyoñ tak chup kī chhuTTī aa.ī hai