Tags-Dard

ham tumhārā dard-e-dil sun sun ke hañste the kabhī
aaj rote haiñ ki yuuñ dard-āshnā kyuuñ ho ga.e

aa.e to dil meñ pyaar kā chashma ubal paḌā
aur chal diye to dard kī bohtāt ho ga.ī

maiñ us kā dard 'kalkal' kaise bāñTūñ
ki jo chhāle dikhātā bhī nahīñ hai

pahlī sī lazzateñ nahīñ ab dard-e-ishq meñ
kyuuñ dil ko maiñ ne zulm kā ḳhūgar banā diyā

kyuuñ dard ke naame likhte likhte raat karo
jis saat samundar paar kī naar kī baat karo

dard-e-nihāñ ke chhīn liye kis ne ā.īne
nok-e-mizha se qatra-e-ḳhūñ kaun le gayā

āh-o-fuġhān-o-girya-o-andoh o dard o daaġh
jo jins-e-ishq hai vo mire paas sab hai ab

uThegā phir na kaleje meñ mīThā mīThā dard
agar likhe mire dil par tirī nazar ta.avīz

dard ne dil pe mire phir se lagā.ī dastak
us kī rāheñ sabhī phūloñ se sajā.ī jaa.eñ

dard ab aañkh tak nahīñ aatā
dard ko dil meñ paal rakkhā hai

tamāshā hai ki ham us ko masīhā dam samajhte haiñ
hamāre dard kā jis se mudāvā ho nahīñ saktā

kitne be-dard haiñ is des meñ rahne vaale
apne hāthoñ tujhe suulī pe chaḌhā ke ronā

dard-o-rañj-o-alam o hasrat-o-dāġh o ġham-o-rashk
mujh ko kyā kyā na tire ishq meñ āzār mile

dukh-dard mire paas bhī jauhar kī tarah haiñ
zulmat meñ vo qindīl-e-munavvar kī tarah haiñ

hoñ ḳhalish dost duā hai ki davā ke badle
yārab is ahd meñ dard-e-dil-e-bīmār bike

maiñ hañs rahā thā garche mire dil meñ dard thā
ye raaz khul gayā to mirā chehra zard thā

ḳhud apnī zaat ke na kisī kaam aa sake
vo log jin ke dil meñ zamāne kā dard thā

tum ne jis ko ġham-e-ayyām kahā hai yaaro
vo mire dard kā hissa hai tumhārā kyā hai

kyā farz hai ki īsā-o-mariyam dikhā.ī de
maslūb dard chīḳhe ki maiñ ibtilā meñ huuñ

kabhī sāmne se jo vo jaa.e hai kabhī pher muñh ko dikhā.e hai
mujhe dard-e-rashk satā.e hai ki yahī vo ġhairat-e-māh hai