Tags-Dard

sochte haiñ kyuuñ zinda haiñ
achchhā ye sar-dard milā

sardī meñ din sard milā
har mausam bedard milā

karegā naaz taḌapne meñ ham se kyā bismil
kamī-e-dard-e-jigar vaañ nahīñ to yaañ bhī nahīñ

bosa hoñToñ kā mil gayā kis ko
dil meñ kuchh aaj dard mīThā hai

dard-e-dil ne hameñ kyā kyā hai chakhā.ī lazzat
is liye dil ko mire ḳhvāhish-e-ārām nahīñ

shām-e-visāl-e-dard ne jaate hue kahā
kal phir mileñge dost agar zindagī rahī

ḳhabar na afshāñ kī ham jhalak se na tum ḳhabar dard kī chamak se
kuchh in dinoñ meñ bure sitāre idhar hamāre udhar tumhāre

ye aa.ina thā magar ġham kī rahguzār meñ thā
aTā huā mirā dil dard ke ġhubār meñ thā

mire dard kī haqīqat koī mere dil se pūchhe
ye charāġh vo hai jis se mire ghar meñ hai ujālā

jahāñ ġham milā uThāyā phir use ġhazal meñ Dhālā
yahī dard-e-sar ḳharīdā yahī rog ham ne paalā

dard-e-dil ruuī se na sekvānā
aag hai is taraf ke pahlū meñ

vo uTThe dard uTThā hashr uTThā
magar dil hai ki baiThā jā rahā hai

dard tham jā.egā ġham na kar, ġham na kar
yaar lauT ā.eñge, dil Thahar jā.egā, ġham na kar, ġham na kar

zindagī ho magar dard-e-hijrāñ na ho
aise jiine kī kyā aarzū kījiye

biich diloñ meñ utrā to hai
dard tirā albelā to hai

mujh ko talab se kyā milā dard-o-sarāb āgahī
merī nazar meñ mo'tabar shahr-e-jamāl bhī nahīñ

kabhī dard kī tamannā kabhī koshish-e-mudāvā
kabhī bijliyoñ kī ḳhvāhish kabhī fikr-e-āshiyāna

gila na kar ki hai āġhāz-e-shab abhī pyāre
Dhalegī raat to ye dard aur chamkegā

jaane kin kin logoñ se is dard ke kyā kyā rishte the
hijr kī is ābād sarā meñ sab chehre nādīda haiñ

yuuñ nigāhoñ meñ utarne lage yādoñ ke nujūm
dard bhī mahv huā ā.ina-sāmānī meñ