Tags-Dard

ehsān tirā mujh par hotā gar ruuh ko kartā tan se judā
jab jaan bachī furqat kī shab ai dard-e-jigar kuchh bhī na huā

ham ahl-e-dard chaman meñ isī liye aa.e
ki āñsuoñ se zamīn-e-chaman bhigo jaa.eñ

ye ziist hai 'fuzail' ki dariyā-e-dard hai
har lamha ġham kī umDī huī lahar ban gayā

charāġh-e-dard ki sham-e-tarab pukārtī hai
ik aag sī lab-e-dariyā-e-shab pukārtī hai

zarre ke zaḳhm dil pe tavajjoh kiye baġhair
darmān-e-dard-e-shams-o-qamar kar rahe haiñ ham

kal jo maiñ ne kahā ki o be-mehr
dard-e-furqat se mar rahā huuñ maiñ

shāreh-e-hāl-e-dil samajh mujh ko
dard hī dard ho gayā huuñ maiñ

ilāj-e-dard-e-mohabbat to kar nahīñ sakte
tumhāre qabze meñ kyā marg-e-nā-gahāñ bhī nahīñ

vo dard-e-dil bhī nahīñ chashm-e-ḳhūñ-fishāñ bhī nahīñ
kabhī jo thā vo ab andāz-e-gulistāñ bhī nahīñ

vo jo uḌtī hai sadā dast-e-vafā meñ 'afzal'
usī miTTī meñ nihāñ dard kā gauhar dekhā

dard-e-jigar ḳhud apnī davā ho aisā bhī ho saktā hai
yuuñ hī kitāb-e-zar meñ likhā ho aisā bhī ho saktā hai

har ek dard rihā ho gayā mire dil se
ki maiñ ne jab bhī tirā hañstā chehra dekhā hai

'najmī' ye ḳhamoshī bhī merī kuchh vaj.h-e-sukūn-e-dil na huī
maiñ zabt-e-fuġhāñ se dard ko apne aur baḌhātā jaatā huuñ

chāñd kā dard maañg le koī
mujh ko rahnā hai umr-bhar tanhā

diloñ pe chhoḌ ga.e naqsh apnī yādoñ kā
tumhāre dard ke maare jidhar se guzre haiñ

ek 'farāz' tumhīñ tanhā ho jo ab tak dukh ke rasiyā ho
varna aksar dil vāloñ ne dard kā rasta chhoḌ diyā hai

maiñ samajh rahā huuñ tirī kasak tirā merā dard hai mushtarak
isī ġham kā tū bhī asiir hai isī dukh kā maiñ bhī shikār thā

kitāb-e-umr kā har baab be-maza ho jaa.e
jo dard maiñ na rahūñ aur daaġh tū na rahe

hai justujū meñ tirī ik jahāñ kā dard-o-nishāt
to kyā ajab ki koī aur justujū na rahe

karo hamāre hī dāġhoñ se raushnī tum bhī
baḌā hai dard kā rishta duī kī bū na rahe