Tags-Dard

har dam ye do adū haiñ pa.e-jān-e-nā-tavāñ
ik dard-e-ishq hai ġham-e-hijrāñ hai dūsrā

jab zulm kā badla zulm huā mazlūm kā haq kuchh bhī na rahā
de dard hī meñ lazzat yārab naale ko atā tāsīr na kar

kisī ke ek dard-e-bandagī se kyā milī fursat
ki dil meñ sau tarah kā dard paidā kar liyā maiñ ne

havā meñ dard kī shiddat se zamzama-pairā
sunegā kaun ye merī sadā-e-āḳhir-e-shab

tū ne mire dard kā darmāñ kiyā
aur bhī kuchh dard sivā ho gayā

ye ḳhvāhish-e-visāl hai yā hijr kā sulūk
chuTkī sī lī hai dard ne aa kar jigar ke biich

DabDabā aa.eñ mujhe dekh ke āñkheñ us kī
haa.e be-dard mire dard-e-moharram to nahīñ

lazzat-e-dard vahī hai vahī kaifiyyat-e-zīst
iltifāt-e-nigah-e-nāz abhī kam to nahīñ

rāteñ aish-o-ishrat kī din dukh dard musībat ke
aatī aatī aatī haiñ jaate jaate jaate haiñ

dard-e-dil ke ghā.il hote jaate haiñ
aap hamārī manzil hote jaate haiñ

dard ban kar mire siine meñ paḌā rahtā hai
ye mirā dil hai ki ik naqsh-e-qadam hai us kaa?

muḳhtasar us ko kiyā hai mutabassim ho kar
varna rūdād mire dard kī tūlānī thī

sheva-e-jaur ko rakh ahl-e-vafā tak mahdūd
aam faiz-e-ḳhalish-e-dard-e-ḳhudā-dād na kar

aa.ī hai yaad jin kī tūfān-e-dard ban ke
vo zaḳhm maiñ ne aksar khaa.e haiñ muskurā ke

dard kī had se guzar kar to yahī honā thā
aañkh pathrā ga.ī ashkoñ kī kahānī sun kar

husn jab qātil na thā aur ishq dīvāna na thā
zindagī meñ dard-o-ġham kā koī afsāna na thā

bharte hī rahe suud meñ ik ik dhaḌkan
mansūḳh kiyā dard kā saudā na kabhī

barg bhar baar mohabbat kā uThāyā kab thā
tum ne siine meñ koī dard basāyā kab thā

zaḳhmī-e-ġham kyuuñ na khīñche āh-e-dard
halq-e-bismil kuuñ sadā darkār hai

sarmāya-e-hayāt mire paas kam nahīñ
zaḳhm-e-jigar fareb-e-nazar dard sab to hai