Tags-Dariya

ye maujeñ ye sāhil ye kashtī ye dariyā
na jaane kahāñ nāḳhudā lāpata hai

maut kī aag meñ tap tap ke nikhartī hai hayāt
Duub kar jañg ke dariyā meñ ubhartī hai hayāt

ġham kā dariyā suukh na jaa.e us kī ravānī kam na paḌe
ḳhūn-e-jigar bhī shāmil kar luuñ aañkh meñ paanī kam na paḌe

ik aag ke dariyā ko batāyā hai chaman-zār
ham Dūbne vāloñ kī ri.āyat se jale haiñ

dariyā meñ vo dhoyā thā kabhī dast-e-hinā.ī
hasrat se vahīñ panja-e-marjāñ meñ lagī aag

chaḌhtā dariyā utar gayā maiñ bhī
sar se paanī guzar gayā maiñ bhī

bujh gayā gir ke ḳhunuk aab meñ chāñd
sat.h-e-dariyā pe sadā baaqī hai

dekh dariyā ko ki tuġhyānī meñ hai
tū bhī mere saath ab paanī meñ hai

āḳhirash Dūbnā paḌā mujh ko
aarzū thī yā koī dariyā thī

huī jo zer-o-zabar ziist yuuñ masā.il se
ġhurūr-e-ishq kā dariyā utar hī jaanā thā

jaate jaate diyā is tarah dilāsā us ne
biich dariyā meñ koī jaise kināra niklā

ye rūd-e-ḳhvāb nahīñ maḳhmase kā dariyā hai
Dubo.e ishq kabhī josh meñ uchhāle mujhe

dikhātī hai mire ashkoñ kī tuġhyānī mujhe kyā kuchh
habāb-e-dil kabhī dekhā kabhī amvāj-e-dariyā ko

ye apnā apnā muqaddar hai is ko kyā kahiye
tujhe sarāb to dariyā banā diyā hai mujhe

maiñ dariyā huuñ magar kitnā satāyā jā rahā huuñ
ki bastī roz aa ke merā paanī kāTtī hai

koī samjhāo dariyā kī ravānī kāTtī hai
ki mere saañs ko tishna-dahānī kāTtī hai

thā magar sab kuchh na thā dariyā ke paar
is kināre bhī kinārā thā kabhī

dariyā tūfān bah rahā hai
āñkhoñ kā ajiib mājrā hai

shab-e-tār kachchā ghaḌā ek dariyā
maiñ baḌhne lagī dāstānoñ kī jānib

ham apne shauq meñ Duube hue haiñ
hamāre shahr meñ dariyā kahāñ hai