Tags-Dariya

hasīñ the duur hī se sāhil-o-dariyā ke nazzāre
magar jab Duub kar dekhā to sāhil thā na dariyā thā

ye vahm-e-duī dil se judā karnā thā
is qatre ko dariyā meñ fanā karnā thā

tum bhī is sūkhte tālāb kā chehra dekho
aur phir merī tarah ḳhvāb meñ dariyā dekho

tū dariyā hai aur Thaharne vaalā maiñ
gum hai mujh meñ ḳhud se guzarne vaalā maiñ

dariyā ke kināre to pahuñch jaate haiñ pyāse
pyāsoñ ke gharoñ tak koī dariyā nahīñ jaatā

is zamīñ par pyaas kī shiddat huī thī kab ayaañ
kis ne sochā thā nihāñ dariyā zamīñ ke us taraf

pheñkī kisī ne kañkarī dil yak-ba-yak dariyā huā
dariyā meñ ik sailāb thā sailāb thā umDā huā

zindāñ zindāñ shor-e-anal-haq mahfil mahfil qul-qul-e-mai
ḳhūn-e-tamannā dariyā dariyā dariyā dariyā dariyā aish kī lahr

tū nahāne ghaaT par aayā to dariyā jal gayā
ātish-e-ruḳh se tire jo kuchh vahāñ thā jal gayā

utar gayā hai vo dariyā jo thā chaḌhāo par
bas ab jamāv kināroñ pe pattharoñ kā hai

vo ek phuul jo bahtā hai satah-e-dariyā par
use ḳhabar hai ki kyā dukh shanāvaroñ kā hai

har ek lahr hai apne isī bahāo meñ
maiñ thak gayā tire dariyā ko raam karte hue

Dubo rahā hai mujhe Dūbne kā ḳhauf ab tak
bhañvar ke biich huuñ dariyā ke paar hote hue

apnī mastī meñ bahtā dariyā huuñ
maiñ kināra bhī huuñ bhañvar bhī huuñ

thā jinheñ zo.am vo dariyā bhī mujhī meñ Duube
maiñ ki sahrā nazar aatā thā samundar niklā

Dhale to hotī hai kuchh aur ehtiyāt kī umr
ki bahte bahte ye dariyā uchhāl letā hai

koī payām-e-musalsal hai shor-e-dariyā bhī
tahī-suḳhan se nahīñ hai sukūt-e-sahrā bhī

pyāle meñ jo paanī hai
dariyā kī hairānī hai

dariyā kabhī palaT ke nahīñ aayā aaj tak
badlegā kis tarah se irāda faqīr kā

nuur kā dariyā bahāne ke liye
naġhma-e-firdaus gaane ke liye