Tags-Dariya

aisā mātam kabhī dariyā kā na dekhā na sunā
jaane kis pyaas ne paanī ko azā-dār kiyā

karūñ kyā bayāñ maiñ ye ehsān-e-ishq
ki qatre se dariyā banāyā mujhe

kah rahe the log sahrā jal gayā
phir ḳhabar aa.ī ki dariyā jal gayā

hamesha vaqt kā dariyā ise raftār baḳhshegā
jise aatā ho dariyā kī ravānī pusht par rakhnā

ashk-e-ḳhūñ dil se umañD aate haiñ dariyā kī tarah
dāman-e-chashm bhigone bhī nahīñ detā hai

nahīñ thā us ke barābar kā ahl-e-zar bhī koī
magar ġharīb kī dariyā-dilī se haar gayā

jidhar ko mirī chashm-e-tar jā.egī
udhar kaam dariyā kā kar jā.egī

badan kashtī bhañvar ḳhvāhish irāda bādbāñ jaisā
junūñ-dariyā chalo ḳhud ko kināra kar ke dekhūñgā

paar utarne ke liye to ḳhair bilkul chāhiye
biich dariyā Dūbnā bhī ho to ik pul chāhiye

vo kyā ki sab tishna-kāmiyāñ juuñ kī tuuñ paḌī haiñ
ye kyā ki dariyā kā ābyāna lagā huā hai

maiñ bhī qatra huuñ tirī baat samajh saktā huuñ
ye ki miT jaane ke Dar se koī dariyā ho jaa.e

ye kis ne aañkh ko nañgā kiyā hai dariyā meñ
mahaktī ret pe koī bhī be-libās na thā

dariyā se pyaas bujh na sakegī ye soch kar
lahrā ke chal paḌe the samundar kī chaah meñ

maiñ dariyā kī gahrā.ī tak jaatā huuñ
maiñ ne kaun sā paar utarnā hotā hai

safar sarāboñ kā bas aaj kaTne vaalā hai
ki mere paañv se dariyā lipaTne vaalā hai

rañg sāhil kā nikhar aa.egā
do ghaḌī jānib-e-dariyā dekho

josh meñ aa jaa.e rahmat kī tarah
ek ik qatre ko dariyā kījiye

bas ab ai zabt ziyāda mujhe mahjūb na kar
hai mirī aañkh kī taqdīr meñ dariyā honā

ab is ko DhūñDhtā phirtā huuñ shahr o dariyā meñ
chalā gayā vo dikhā kar bas ik jhalak mujh ko

bhaag kar aa gayā huuñ sar-e-shām dariyā kināre gumāñ meñ hai terā dvāra
zamāne meñ aise to mumkin nahīñ hai ki mandir meñ sar ko jhukā.e rahe har pujārī