Tags-Dariya

DhūñDne vaale pā letī haiñ ant samundar kā sā.īñ
thaah milī nahīñ jis kī kisī ko dil hai vo dariyā sā.īñ

isī dariyā se uThtī hai vo mauj-e-tund-jaulāñ bhī
nahañgoñ ke nasheman jis se hote haiñ tah-o-bālā

nigah paidā kar ai ġhāfil tajallī ain-e-fitrat hai
ki apnī mauj se begāna rah saktā nahīñ dariyā

ab kyā karoge sair-e-saman-zār-e-ārzū
rut jā chukī chaḌhe hue dariyā utar chale

samundar ne ravānī siikh lī hai
mire dariyā tumhārā kyā banegā

vo ham-safar thā kashtī pe māñjhī bhī thā vahī
dariyā vahī hai maiñ bhī huuñ kashtī nahīñ rahī

sabr ke dariyā meñ jab aa jā.egā
dil ġhamoñ se ḳhud ubhartā jā.egā

tujh ko bilkul nahīñ ehsās-e-hunar ai dariyā
ab tire vāste tairāk kahāñ se laa.eñ

aur kuchh din us se milne ke liye jaate raho
bastiyāñ bas jā.eñgī dariyā ke paar agle baras

ḳhushk miTTī hī ne jab paañv jamāne na diye
bahte dariyā se phir ummīd koī kyā rakkhe

kahāñ tak aap lagā.eñge us pe zabt ke bāñdh
kabhī ye āñkhoñ kā dariyā biphar bhī saktā hai

qaus-e-quzah ke rañg mayassar nahīñ to phir
dariyā kī mauj mauj meñ baT kar kalām kar

jā.eñge ek roz samundar kī god meñ
dariyā ke saath ret kī tahrīr aur ham

maiñ ne vo patvār bhī lauTā diye
biich dariyā ke kinārā rakh diyā

bah ga.e dīda-e-nam-nāk se dariyā lekin
dil vahī ek dahaktā huā añgāra hai

bahte dariyā ko bhī ye kaa.ī kahāñ chhoḌtī hai
ishq ho jaa.e to rusvā.ī kahāñ chhoḌtī hai

muhtāj-e-abr-o-bād hue ahl-e-ḳhāk-dāñ
har chand is zamīñ meñ the dariyā chhupe hue

ik umr se chup thā dil dariyā ik roz magar phir umaD paḌā
tan man sab jis meñ Duub ga.e har mauj ne vo tūfān kiyā

har ik sarhad phāñd chukā thā sarkash dariyā
us dariyā ko moḌ ke laanā ishq meñ sīkhā

girdāb chīḳhtā hai ki dariyā udaas hai
dariyā ye kah rahā hai kinārā nahīñ rahā